28/05/2026
Ghadni kemm ircevejt dan. Min kiteb ma jridx juri ismu ghal ragunijiet ovvji.
Jien dejjem kont Laburist fil-vot tiegħi, apparti fl-1998 meta vvutajt Alternattiva minħabba d-diżgwid bejn il-Partit Laburista u Mintoff. Fl-UE vvutajt LE għax emmint li Malta kellha tibqa’ tiddeċiedi hi fuq futurha. Fl-2013 tajt il-fiduċja lil Joseph Muscat għax il-PN kien sar arroganti, qisu kellu dritt divin li jibqa’ fil-gvern għal dejjem. Il-prepotenza kienet tidher minn kullimkien u l-poplu ried bidla.
Imma llum inħoss diżappunt kbir. Il-Partit Laburista tilef il-boxla soċjalista tiegħu u sar partit neo-liberali fejn is-suq jiddetta kollox. Negozji żgħar tal-familji tkissru minħabba l-invażjoni ta’ big supermarkets, żgħażagħ Maltin mhux qed isibu jikru jew jixtru propjetà, u d-dħul bla kontroll ta’ barranin kompla għolla l-prezzijiet u għafas fuq il-kwalità tal-ħajja inġenerali.
Ħafna żgħażagħ Maltin illum qed jagħżlu li jitilqu minn pajjiżhom għax ma għadhomx jaraw futur hawn. U magħhom tlifna wkoll ħafna professjonisti, speċjalment fil-qasam tas-saħħa nies li studjaw fl-University of Malta u li l-poplu Malti investa fihom permezz tat-taxxi tiegħu. Minflok ma żammejnihom hawn b’kundizzjonijiet u kwalità ta’ ħajja aħjar, spiċċajna niddependu fuq importazzjoni massiva ta’ ħaddiema u professjonisti minn sistemi edukattivi ħafna drabi inferjuri, b’detriment għall-kwalità tas-servizzi u għas-saħħa tal-poplu.
Mhux kontra l-progress jew kontra min jiġi jaħdem b’onestà, imma kontra politika li tpoġġi l-flus qabel il-bniedem. Meta anke nies soċjalisti bħal Sammy Meilaq qed jgħidu li mhux se jivvutaw, turi kemm hemm diżillużjoni kbira.
U proprju għalhekk, din id-darba se nivvota PN. Mhux għax sirt Nazzjonalist jew għax irrid vendikazzjoni, iżda għax nemmen li l-Partit Laburista għandu bżonn żmien fl-oppożizzjoni biex jitnaddaf, jagħmel awtokritika serja u jerġa’ jsib l-għeruq veri tiegħu.
Dan mhux vot ta’ mibegħda, imma vot ta’ korrezzjoni. Bħal omm li tħobb lil binha iżda xi kultant ikollha ċċanfar u tieħu deċiżjoni iebsa biex jerġa’ jaqbad it-triq it-tajba. Xi drabi l-akbar att ta’ lealtà mhux li tibqa’ tapplawdi dejjem, imma li tgħid il-verità meta tara lil min kont temmen fih tilef it-triq.
