17/09/2026
《第3609天》
終於停低打番過去一週福隆嘅感想，返到去自己出世嘅地方擺攤，真係百感交集，滿滿回憶湧上心頭。
生日會去食嘅佛笑樓，福隆賣蛇嘅專門店，表姐夫屋企開嘅煲仔飯，有咸書賣嘅士多，流水席嘅福榮里，去梁慶記同三元食宵夜等等，午餐飯堂福龍，同永遠都覺得食唔起嘅西南。重遊舊地現在福隆新街都已經變左好多，大部份都變得遊客向，好多老街坊都唔係到，全部都變成回憶。我係一個重感情嘅人，重遊舊地，面目全非，仲會有些感傷。
不過開心見到人煙稀疏嘅地方變得熱鬧，令到人會知道澳門有呢個地方，有呢一條街，但唔開心係覺得阻到好多街坊商戶出出入入。
無論係點，我都想借呢個event向大眾表達一下我對呢區嘅情懷，幾日都買我由細食到大嘅靈記乳豬同金百合蛋撻請比人食等大家可以感受呢區嘅美食氛圍。
有趣嘅一點係，我哋嘅檔口經歷左連續四日嘅調位之後，回到正正對住細個住嘅柴船尾街，以前就係個檔位等校車。可以話係緣份。不過講真，擺檔呢啲辛苦錢真係唔啱我，無咩事我都係返番鋪頭算。
最後如果鐘意呢個地方，建議走走週邊商店，畢竟新馬路係最早期美食集中地。希望澳門人唔好做澳門嘅遊客，試下深入了解下澳門。
活動做左兩杯特調，Trufflemisu 同 S affritz，係Irishcoffee同Spritz嘅twist，用左倫敦嘅Square mile 嘅兩款專為夏天做嘅 Choco Ice 同 Fruit Punch。一款用左四川嘅鮮黑松露，一款用左番紅花槐花蜜。
特別多謝澳門紋身師✶ 𝔖𝔞𝔦𝔫𝔱𝔢𝔯 ✶嘅sign paint，無佢幫手可能就要用番哥啲美食節招牌。
今次活動請左一個新鋭嘅調酒師朋友@attic_macau合作，來緊佢會開新店，有機會就Follow 下佢。
謝謝!
