10/04/2017
So bietjie Geskiedenis oor die ontstaan van die Lichtenburgse Landbou genootskap
Op 22 Maart 1917 vergader 89 belangstellende Lichtenburgers in die stadsaal onder voorsitterskap van mnr. Munschield, die waarnemende landros. Op voorstel van Ben Lombard en gesekondeer deur P.G Dreyer, prokureur, word die Lichtenburgse landbougenootskap gestig.
Die volledige naam was: “Het Lichtenburg Landbouw Genootschap/Lichtenburg Agricultural Society”
Op hierdie vergadering word E.H. Mathews, J. Voorendyk, D.G. v.d. Merwe, G.J. Greeff, Ben Lombard, A.P. Visser, H. Schulenburg en M. Els as “voorlopige kommissie” verkies.
Daarna word E. Mathews en J. Voorendyk eenparig tot president en ere-sekretaris onderskeidelik verkies. Minder as ‘n maand daarna op 4 April word die volgende persone as beskermhere van die genootskap aangewys: Generaal J.C. Smuts (min. van Landbou), H.C. Hull, Marks, Tielman Roos, LV. A. Johnson, Sir Jan Langerman en die landdros van Lichtenburg.
Ledegeld word vasgestel op 10 sjielings en 6 pennies (R1.05) per lid per jaar. Die gebied wat by die
Genootskap ingesluit was het tot by Ottosdal, Coligny, Sannieshof, Delareyville en Geysdorp gestrek.
Op 18 April van dieselfde jaar word die volg. Komitee aangewys om ‘n geskikte terrein vir die genootskap te soek: E.H. Mathews, Theo Bosman, J. de Beer, P.G. Dreyer, Retief, J. Voorendyk, die
Landdros en die dorpsklerk, C.B. Maartens. Ses dae later kon die komitee ‘n stuk grond aangrensend
aan die spoorwegstasie by die bestuur aanbeveel. Dit het algemene byval gevind en daar is dadelik
begin om die grond te omhein, te ploeg en bome aan te plant. Hierdie terrein is sedertdien tot en met 1983 as skouterrein gedien.
Nieteenstaande die feit dat die gebied waarvoor die genootskap aanvanklik beskik het met verloop
van tyd drasties gekrimp het agv die afstigting van gebiede soos Delareyille, Ottosdal, Sannieshof en
Coligny wat elk met hul eie skou begin het, het die skou omvang van Lichtenburg steeds toegeneem
sodat die skouterrein na 65 jaar te klein geword het. Daarom verkoop die landbougenootskap die terrein in 1981 aan Noordwes Kooperasie Bpk., en bekom ‘n veel groter gebied ‘n paar km oos van die dorp, langs die Lichtenburg/Kosterpad waar die 1e skou reeds in 1984 sou plaasvind. Agv die ongekende droogte wat veral ook hierdie gebied geteister het is die 1984 skou afgelas, en is die volg.
skou reeds in 1985 bepaal. Aanvanklik het die landbougenootskap benewens sy eerste doel, nl. Die
hou van gereelde landbouskoue, ook as spreekbuis v.d. boeregemeenskap opgetree. Hierdie funksie
het dit tot in 1828 vervul toe die Lichtenburgse Boerevereeniging op 12 Mei gestig is.
Nadat verskeie ander landbougenootskappe in die omliggende dorpe gestig is, is die “Wes Transvaalse interskoukomitee” gestig met die doel om mekaar op georganiseerde wyse te skakel.
Bg komitee reel as o.a. die skoudatums vir die gebied en bied ook onderlinge morele steun aan mekaar.
Die Lichtenburgse landbougenootskap se strewe is om jaarliks ‘n skou, wat oor 3 dae strek aan te bied. Die program is omvattend. ‘n Groot verskeidenheid landbouimplemente word jaarliks vertoon.
Daarbenewens wek die afdelings veeteelt, landbouprodukte, pluimvee, huisvlyt, motorvoertuie, masjienerie, kunswerke, blommerangskikkings, kinderkuns, huisversiering, meubels en so meer,
groot belangstelling.
Tydens die 1e skou wat in 1918 gehou is, was E.H. Mathews die voorsitter en J. Voorendyk die
Ere-sekretaris.
In Mei 1985 is die skou vir die eerste keer op die nuwe skouterrein, langs die Lichtenburg Kosterpad
gehou.
Die kulturele en ekonomiese waarde van hierdie jaarlikse skou word dikwels onderskat. Afgesien van die harde werk, die ontspanning, die genieting en die opvoedkundige waarde wat dit bied, wek dit ‘n gesonde, intensiewe en volgehoue kompetisiegees wat as prikkel dien om kwaliteit en
produktiwiteit steeds te verbeter.
