11/05/2025
အကြောင်းအရာတော်တော်များများပါတဲ့အတွက် စာလေးနည်းနည်းရှည်ပါတယ်..
စိတ်ရှည်စွာဖတ်ပေးရင် အများကြီးသိရမှာပါ။..ရေမွှေးကို မှန်ကန်စွာ ရွေးချယ်ဝယ်ယူပြီး မှန်မှန်ကန်ကန် အသုံးပြုနိုင် စေရန်အတွက်...
✤ ရေမွှေး ကို ဘယ်လိုဆွတ်ကြမလဲ •
ရေမွှေး ရဲ့ အဓိက ရနံ့ ဘယ်လိုရွေးမလဲ ✤
ရေမွှေး ပုလင်းပေါ် မှာ Eau da Parfum နှင့်
Eau de Toilette ကွာခြားချက်
.........................
ရေမွှေး ချစ်သူများ မိမိ သုံးနေ တဲ့ ရေမွှေး ကို နည်းစနစ် မှန်မှန် အသုံးပြု နေပါ သလား?
မွှေးရနံ့ ကြာရှည် မခံ လို့စိတ်ညစ် နေပါ သလား?
သင့် အကြိုက် ရေမွှေး ပုလင်း ရှိပေမယ့် အပြည့်အ၀ စိတ်ကျေနပ်မှု မရရှိသေး သူများ အတွက် ဆောင်ရန် ရှောင်ရန် များကို ဖတ်ကြည့်လိုက်ရ အောင်နော်။
1-ရေမွှေးအသုံးပြုဖို့အကောင်းဆုံးအချိန်ကတော့ ရေချိုးပြီးစပါပဲ။
အသားအရည်နူးညံ့ကြည်လင်နေတဲ့ အတွက် အလွယ်တကူ မွှေးရနံ့ကို စုပ်ယူနိုင် ပါတယ်။
2-သင့်စိတ်ကြိုက် ရေမွှေးပုလင်းလေးကို ဖွင့်လိုက်ပါ။လက်ညှိုးထိပ်ပေါ်သို့ ဆွတ်ဖြန်း လိုက်ပါ။ပြီးရင် လက်ညှိုးထိပ်လေးနဲ့ သွေးခုန်နှုန်းစမ်းမိတဲ့နေရာ (Pulse Area)များကို ညင်သာစွာ တို့ပေးပါ။
Pulse Area များကတော့ လက်ကောက်၀တ်၊ လည်ပင်းအဟိုက်၊ နားသယ်စပ်၊ လည်ကုတ်၊ ရင်၊တံတောင်ဆစ်၊ ဒူးခေါင်း နဲ့ ပေါင်အတွင်းနေရာများ ဖြစ်ပါတယ်။
ဒီနေရာများမှာ သွေးအသွားအလာများတဲ့ အတွက် အရေပြားကိုပူနွေးစေပြီး မွှေးရနံ့ လျင်မြန်စွာ ပျံ့နှံ့စေပါတယ်။
3-Body Spray သုံးမယ်ဆိုရင်တော့ Pulse Area များနဲ့ ၁ပေ အကွာကနေ ဖြန်း ပက်ပေးပါ။ လေထုထဲကို ၂ ချက် ၃ ချက် ဖြန်းပတ်ပေးခြင်းဖြင့်လည်း တစ်ကိုယ်လုံးကို မွှေးရနံ့သင်းပျံ့စေမှာပါ။
4-ခြောက်သွေ့တဲ့အသားအရည်ပိုင်ရှင်များအဖို့ အဆီပြန်တဲ့အသားအရည်ရှိသူများလို တစ်နေကုန်ကြာရှည်ခံတဲ့မွှေးရနံ့ရဖို့ မသေချာပါဘူး။
အဆီပြန်တဲ့အခါ ရေမွှေးမှာပါ၀င်တဲ့အဆီနဲ့ အလွယ်တကူရောနှောသွားတဲ့အတွက် မွှေးရနံ့ကိုကြာရှည်ထိန်းသိမ်းထားနိုင်တာပါ။ဒါကိုဖြေရှင်းဖို့ကတော့ အလွယ်လေးပါ၊ Moisturizer လိုးရှင်းတစ်ခုခုကို အရင်လိမ်းပြီးမှ ရေမွှေးဆွတ်လိုက်ပါ။
5-ရေမွှေးဆွတ်လို့ ပြီးသွားပါပြီ။အ၀တ်အစားများကို ချက်ချင်းမ၀တ်လိုက်ပါနဲ့ဦး။ ခြောက်သွေ့အောင် ခဏစောင့်လိုက်ပါ။
ပွတ်တိုက်မိရင် အနံ့ပြောင်းသွားပြီး ကြာရှည်မခံတော့ပါဘူး။
6-သင်တခြားအသုံးပြုနေတဲ့ ရေချိုးဆပ်ပြာ၊လိုးရှင်း၊ခေါင်းလျှော်ရည် ၊စတာတွေရဲ့အနံ့ကိုလည်း ဂရုစိုက်ပါ။မိမိသုံးမယ့် ရေမွှေးရဲ့မွှေးရနံ့ကို ဖုံးအုပ်မသွားတဲ့ ခပ်ဆင်ဆင်ရနံ့မျိုးကို ရွေးချယ်ပါ။
“ အကောင်းဆုံးကတော့ နှစ်သက်ရာ Brand တစ်ခုခုကို Series လိုက်သုံးပါ။ ”
7-ရာသီဥတုကိုကြည့်ပါ။ ပူပြင်းတဲ့အခါမွှေးရနံ့ပိုမိုထွက်ပြီး ရာသီဥတုအေးတဲ့အခါ အကြာကြီးမခံပါဘူး။ရေမွှေးအနည်းအများကို ချိန်ညှိပြီးအသုံးပြုပါ။
...................................................................
ရေမွှေးဘယ်လိုဆွတ်ရမလဲဆိုတာ သိပြီးတဲ့အပြင် ရှောင်ရန်အချက်တွေကိုဆက်ပြီး
ကြည့်လိုက်ရအောင်!
1-ရေမွှေးကို တတ်နိုင်သမျှ အ၀တ်အစား၊ လက်၀တ်ရတနာများကို မဆွတ်ပါနဲ့။
အခန့်မသင့်ရင်…စွန်းထင်းတတ်ပါတယ်။
2-Pulse Area များကိုအကုန်လုံးရေမွှေးဆွတ်ရမယ်လို့ မဆိုလိုပါဘူး။
ရေမွှေးဆိုရင် ၃ စက် ၊ Body Spray ဆိုရင် ၅ ချက် က လုံလောက်ပါတယ်
ရေမွှေးအလွန်အကျွံအသုံးပြုတာက ရေမွှေးရဲ့ထိရောက်မှုမရှိစေတော့ပါဘူး။
3-ဆံပင်ကို ရေမွှေးမဆွတ်ပါနဲ့၊ ခေါင်းလိမ်းဆီ၊ခေါင်းလျှော်ရည်၊Conditioner၊ ဆံပင်ဆိုးဆေးတို့နဲ့ ဓာတ်ပြုနိုင်ပါတယ်။
4-နောက်ဆုံးအချက်ကတော့ ရေမွှေးတစ်မျိုးထဲကို စွဲမြဲသုံးတာထက် အခြေအနေ အချိန်အခါ နဲ့ လိုက်လျောညီထွေစွာ မိမိနှစ်သက်ရာရေမွှေး မျိုးစုံ သုံးစွဲ သင့်ပါတယ်။
ရေမွှေးနံ့ပတ်သက်ပြီး အဆင်ပြေစွာသုံးစွဲနိုင်ဖို့ အထောက်အကူဖြစ်ပါစေလို့ မျှော်လင့်ပါတယ်။
===================================================
✤ ရေမွှေး ရဲ့ အဓိက ရနံ့ ဘယ်လိုရွေးမလဲ ✤
ပတ်ဝန်းကျင်နဲ့ သဟဇာတဖြစ်ပြီး ကိုယ်နဲ့လိုက်ဖက်မဲ့ရေမွှေးလေးတွေ ၀ယ်ယူဖို့ ခက်ခဲကြမှာပါ. အားလုံးအတွက် ဒီ Notes လေးက အသုံး၀င်မယ်လို့ထင်ပါတယ်ရှင့်
• Research လုပ်ပါ •
------------------
ကိုယ်မ၀ယ်ခင်မှာ ဒီ ရေမွှေးအကြောင်း ဘယ်သူတွေ ဘယ်လို Recommend လုပ် ကြလဲ? Official Website မှာရော ဘယ်လိုရေးထားလဲ အရင်ဆုံး ရှာပြီး ဖတ်ကြည့်ပါ. အဆင်ပြေမယ်ဆို ရေမွှေးတွေရောင်းတဲ့ဆိုင်မှာ သွားစမ်းကြည့်ပါ. အပြင်မှာ ၀ယ်တာနဲ့ Online ကမှာတာ နဲ့ စျေးနှုန်းလည်း တစ်ခါတည်း ချိန်လို့ရသွားတာပေါ့.
• ကိုယ့်ရဲ့ Fragrance Personality ကို သိအောင်လုပ်ပါ •
-------------------------------------------------------
Fragrance Personality ဆိုတာ ရှင်းရှင်းပြောရရင် ကိုယ်ကြိုက်တဲ့ အနံ့အုပ်စုကို ပြောချင်တာပါ. ကိုယ့် Lifestyle နဲ့ ကိုယ့်အကြိုက် နဲ့ လိုက်ဖက်တဲ့ အနံ့ကို သိမှ ရေမွှေးရွေးရတာလွယ်ကူမှာပါ.
“ အဓိကအားဖြင့် ရနံ့အုပ်စု ၄ ခုရှိပါတယ်. Fresh, Floral, Woody နဲ့ Oriental
ဆိုပြီးတော့ပါ ”
Fresh :
-------
ပင်လယ်ပြင်ကို ဖြတ်ပြီးတိုက်လာတဲ့ ဆားရနံ့သင်းသင်းလေးနဲ့ရေအနံ့၊ မိုးရွာပြီးကာစ ရတဲ့ မြေသင်းနံ့၊ ရေလောင်းပြီးကာစ မြက်ပင်းလေးတွေ ရနံ့၊ လိမ္မော်သီး၊ သံပုရာသီးလို Citrus ရနံ့၊ Aquatic ဆန်ဆန် လန်းဆန်းပြီး လူငယ်ဆန်တဲ့ ရနံ့လေးတွေပါ.
Descrtipion မှာ Citrus, Green, Organic လို့ပါတတ်ပါတယ်.
( Marc Jacob Daisy, Elizebath Arden Green Tea, CK One )
Floral :
-------
ပန်းရနံ့လို့ပဲ ရှင်းရှင်းလေးပြောပါရစေ. နှင်းဆီရန့ံ့၊ စံပယ်ရနံ့၊ ချယ်ရီပန်း၊ ဆာကူရာပန်း၊ လီလီပန်း၊ etc. ပန်းပေါင်းစုံ ရနံ့လေးတွေပါ. Description မှာ ပန်းရနံ့ အမည်တွေ ပါတတ်ပါတယ်.
( Gucci Floral, DKNY Delicious, YSL Baby Doll )
Floral Scent ကို ပဲတခြား ရနံ့တွေနဲ့ ရောလိုက်ရင် အရမ်းကို စွဲမက်စရာလေး တွေပါ. Berry သီး ရနံ့လေးတွေ ရောလိုက်ရင် Fruity-Floral ရနံ့ဖြစ်တဲ့ Victoria's Secret Pure Seduction, Adidas Fruity Rhythm တို့လို Romantic ရနံ့ မျိုးလေးရပါတယ်.
နည်းနည်း အီတဲ့ Vinella, Musk ရနံ့လေးတွေ ရောလိုက်ရင် Floral-Oriental ရနံ့ဖြစ်တဲ့
( Chanel No.5, Dior J'Adore ) လို Classic ဆန်တဲ့ ရနံ့ မျိုးပါ.
Woody :
---------
ယောက်ျားဆန်တဲ့ ပြင်းရှရှ ရနံ့မျိုးပါ. ဆူးရှတဲ့ ရနံ့ ဖြစ်ပြီး လူကြားထဲမှာ ကိုယ့်ကို ထင်ပေါ်နေစေမယ့် Confidence ရှိတဲ့ ရနံ့ မျိုးပါ. Description မှာ Sandalwood, Birchwood, Cedar ဆိုတာတွေပါတတ်ပါတယ်.
( Victoria's Secret Love Bitten, Polo Club Sexy For Him )
Oriental :
----------
မုန့်ရနံ့လို့ပဲပြောပြော၊ Bold ဖြစ်တဲ့ ရနံ့လိုပဲပြောပြော Sexy ဆန်ပြီးချိုအီတဲ့ ရနံ့အုပ်စုပါ. Vanilla, Musk, Nutmeg, Coriander ဆိုတာတွေ Description မှာပါတတ်တယ်.
( Chanel Allure Sensuelle, Victoria Secret's very sexy, TBS White Musk
Libertine )
• Notes ဆိုတာဘာလဲ •
------------------------
ရေမွှေးတွေ Description ကိုကြည့်တဲ့အခါမှာ Top note, Middle note, Base note, Musk Note ဆိုပြီး ရေးထားတာတွေ့ဖူးမှာပါ. အဲဒါ ဘာကိုဆိုလိုတာလည်း ဆိုတာ သိမှ ရေမွှေးရွေးတာ အဆင်ပြေမှာပါ.
----------
Top note
----------
Head note လို့လည်းခေါ်ပါတယ်. ရေမွှေးကို ဖြန်းလိုက်ချိန် မှာ ရတဲ့ ရနံ့ ပါ. အဲဒီ ရနံ့ က အကြာကြီးမခံပါဘူး. Strong ဖြစ်တဲ့ ရနံ့ တွေထဲ့တာ များပါတယ်.
Citrus တို့ Ginger ရနံံ့တွေများပါတယ်. Top notes ကတော့ ရေမွှေး ၀ယ်တဲ့နေရာမှာ သိပ်အရေးမပါ ပါဘူး. အကြာကြီးခံတဲ့ ရနံ့ မဟုတ်တဲ့ အတွက်ပါ.
“ ဒါကြောင့်ရေမွှေးကို ဆိုင်မှာ စမ်းလာရင် ကဒ်ပြားလေးတွေကို လွှတ်မပစ်ပါ နဲ့
သိမ်းထားပါ ”
ဆိုင်က ထွက်ပြီး ၁နာရီအကြာမှာ ပြန်ရှုကြည့်ပါ။စမ်းပေး လိုက်ကာစ မှာ ရနံ့က အရမ်းစူးလို့ ကိုယ်မကြိုက်လောက်ဘူးလို့ ထင်ပေမယ့်Top notes ပျောက်သွားပြီး ထွက်လာတဲ့ Middle notes က ကိုယ့်အကြိုက် ဖြစ်နေနိုင်ပါတယ်.
--------------
Middle note
--------------
Heart note လို့လည်းခေါ်ပါတယ်.နှလုံးက လူ့ခန္ဓာကိုယ်မှာ အရေးအကြီးဆုံး ဖြစ်သလို Heart note ကလည်း ရေမွှေးမှာ အရေးအကြီးဆုံး notes ဖြစ်ပါတယ်.
Heart notes မှာရေးထားတဲ့ ရနံ့ တွေက ကိုယ်ကြိုက်တဲ့ ရနံ့ တွေပဲဆိုရင်တော့ ဒီရေမွှေးကို စဉ်းစားသင့်ပါတယ်. ကိုယ်မကြိုက်တဲ့ ရနံ့ တွေပဲ list ထဲမှာ ရေးထားတယ် ဆိုရင်တော့ ဖယ်လိုက် ပါ.
Top note ပျောက်သွားပြီး အချိန်မှာ ထွက်လာတဲ့ ရနံ့ပါ. ရေမွှေးစွတ်ပြီး ၃၀ မိနစ်ကနေ ၁ နာရီ အတွင်းမှာ ရတဲ့ ရနံ့ ဖြစ်ပါတယ်. များသောအားဖြင့် ယဉ်တဲ့ ရနံ့ လေးတွေ ဖြစ်တတ်ပါတယ်.Levender တို့ Rose တို့လိုပေါ့.
------------
Base note
------------
Heart note နဲ့ Base note နဲ့ က ရေမွှေးတစ်ခုရဲ့ အဓိကအစိတ်အပိုင်းတွေပါ.
Base note က ကိုယ့်ခန္ဓာကိုယ်မှာ အကြာဆုံး ကျန်ခဲ့မယ့် ရနံ့ ဖြစ်ပါတယ်.
Base note ကများသောအားဖြင့် Heart note ကို ကြာရှည်ခံအောင် ပံပိုးပေးတဲ့ ရနံ့ ဖြစ်ပါတယ်. Deep ဖြစ်တဲ့ ရနံ့ လို့ဆိုကြပါတယ်.
------------------------------
Musk Note Or Animalistic
------------------------------
Musk notes ကို ရေမွှေးတော်တော်တော်များများ မှာ ပါတာ သတိထားမိမှာပါ.
Base note မှာထည့်ထားတဲ့ Molecule တွေရဲ့ အငွေ့ပြန်တဲ့နှုန်းက ကြာပါတယ်.
ထည့်ထားတဲ့ Molecule အငွေ့ပြန်တဲ့နှုန်းပေါ် မူတည်ပြီး ဒီရေမွှေးက ကိုယ်မှာစွဲတယ်
မစွဲဘူးဆိုတာ ဖြစ်တာပါ.
အဲဒါကြောင့်လည်း ရနံ့အကြာဆုံးကျန်ခဲ့တဲ့ ရနံ့ တာရှည်အခံဆုံး Notes ပါတယ်
===================================================
✤ ရေမွှေး ပုလင်းပေါ် မှာ့ Eau da Parfum နှင့် Eau de Toilette ကွာခြားချက် ✤
ရေမွှေး ဝယ်ယူတော့မယ်ဆိုရင် တစ်ခါတစ်လေ ဝေခွဲမရ ဖြစ်တတ်ပါတယ်။ မိမိဝယ်ယူမယ့် ရေမွှေး ရဲ့ ရနံ့အပြင် ဘယ်လို အမျိုးအစားလည်း ဆိုတာလည်း သိထားတာပိုကောင်းပါတယ်ရှင့်
“ အဲဒီမှာ သတိထားရမှာက Eau da Parfum နဲ့ Eau de Toilette ကွာခြားချက်ပါပဲ ”
မွှေးရနံ့ အဆီနဲ့ အရက်ပြန် ( Alcohol ) ရောနှော ပေါင်းစပ်ပြီး အဆီပါ၀င်နှုန်းပေါ် မူတည်ပြီး ရေမွှေးအမျိုးအစား ခွဲခြားထားပါတယ်…
မိမိအသုံးပြုနေတဲ့ ရေမွှေးပုလင်းကိုကြည့်လိုက်မယ်ဆိုရင် ရေမွှေးနာမည် ရဲ့ အောက်မှာ
‘ Eau de Parfum’ ‘ Eau de Toilette’ နဲ့ ‘ Eau de Cologne’ ဆိုပြီး တစ်ခုခုကို တွေ့ရပါလိမ့်မယ်..
Eau de Parfum (EdP)................................
အများဆုံးတွေ့ရမယ့် ရေမွှေးအမျိုးအစားပါ။
ဥပမာ Hugo Boss Orange for Women Eau Da Parfum က Hugo Boss Orange for Women Eau de Toilette ထက် စျေးပိုများ ပါတယ် ။
မသိတဲ့သူဆို ကွာခြားချက်ကို မသိပဲ စျေးပိုများတာကိုပဲ သတိထားမိမှာပါ။
Eau Da Parfum လို့ပြောလိုက်ရင် ရေမွှေး အဆီ (15%) ပါပါတယ်။
အချို့ Brand တွေ ဆို 20% အထိ ပါတတ်ပါတယ်။
အမျိုးသမီးသုံးရေမွှေးအများစု ဟာ Eau de Parfum များဖြစ်ပါတယ်။ ကြာရှည်ခံပြီး အများကြီး အသုံးပြုစရာ မလို ပါဘူး။ ခန္ဒာကိုယ် ကို ရေမွှေးဆွတ်ဖို့ အတွက်ပဲ အသုံးပြုသင့် ပါတယ်။
Eau de Toilette (EdT)................................
အမျိုးသားသုံးရေမွှေးအများစု ကတော့ Eau de Toilette များပါပဲ။
ရေမွှေး အဆီပါဝင်မှူ 10% အထိပဲပါတတ်ပါတယ်။အဆီ ပါဝင်မှု့ နှုန်း နည်းတဲ့ အတွက် ဆွတ်လိုက်တာ နဲ့ အလွယ်တကူ ရေငွေ့ပျံသွား တတ် ပါတယ်။
အဲ့တော့ Eau da Parfum လောက် ကြာကြာ အနံ့မစွဲပါဘူး။ အနံ့ကသင်းသင်းလေး နဲ့ လတ်ဆတ် ပါတယ်။ ဒါပေမယ့် ကိုယ်ရွေးချယ်တယ့် Brand အပေါ်လည်း အများကြီး မူတည် သေး ပါတယ်။
Eau da Parfum လိုအကြာကြီး မခံတဲ့အတွက် တစ်နေ့ နှစ်ကြိမ်လောက် အသုံးပြုပေးဖို့ လိုအပ်ပါတယ်။
ရေချိုးပြီးစ အချိန်များမှာ အသုံးပြုရင် လန်းဆန်း ကြည်လင်တဲ့ မွှေးရနံ့ကို ပေးစွမ်းမှာပါ။ မိမိအသုံးပြုနေတဲ့ လက်ကိုင်ပဝါ၊ အိပ်ယာခင်း ၊ ခေါင်းအုံးစွပ် စတာတွေကိုပါ ဆွတ်ဖြန်း ပေးနိုင်ပါတယ်။
Eau de Cologne.........................
ယနေ့ခေတ်မှာ အတော်ကို ရှားပါးသွားပါပြီ။ အရင်တုန်းက အော်ဒီကလုန်းလို့ နံမယ်ကြီး
ခဲ့တဲ့ ရေမွှေးအမျိုးအစားပါ။
ဂျာမဏီနိုင်ငံက Cologne ( ကိုလုန်း) မြို့က စတင်တီထွင်ထုတ်လုပ်ခဲ့တာပါ။
တကယ်တော့ ရေမွှေးအဆီပါ၀င်မှု အနည်းဆုံး ရေမွှေးအမျိုးအစားဖြစ်ပါတယ်။
ပြင်သစ်ဘုရင် နပိုလီယံ ကတော့ စွဲမြဲစွာသုံးစွဲခဲ့ပါတယ်။
၂နာရီ ၃နာရီသာ မွှေးရနံ့စွဲစေတဲ့ အတွက် အော်ဒီကလုန်းသုံးမယ်ဆိုရင်တော့
မကြာခဏ ရေမွှေးဆွတ်ဖို့ မမေ့ပါနဲ့။
စျေးကွက်ထဲမှာ ရရှိနိုင်တဲ့ ဒီရေမွှေးအမျိုးအစား(၃)မျိုးအပြင် အလှပြင် ပစ္စည်း ထုတ်လုပ် ရာမှာ သာ အသုံးပြုတဲ့ True Perfume ဆိုတာ ရှိပါ သေးတယ်။ စျေး အင်မတန် ကြီးပြီး ရေမွှေး အဆီ ပါ၀င်မှု 40% ခန့် ပါ၀င် ပါတယ်။
ဒါပေမယ့် ကြာရှည်မခံတဲ့အတွက် အသုံးပြုဖို့ အဆင်မပြေလှပါဘူး။
ရေမွှေးချစ်သူတို့ ရေမွှေးအနံ့ကောင်းမကောင်း ဘယ်လိုဆုံးဖြတ်ကြပါသလဲ။ ရေမွှေး Tester Paper က အနံ့ကိုရှူရှိက်လို့ပဲဖြစ်ဖြစ် .. ပုလင်းအဖုံးကိုဖွင့်လို့ အနံ့ခံလို့ပဲ ဖြစ်ဖြစ် များသောအားဖြင့် မိမိ ချက်ချင်းရရှိလိုက်တဲ့ ရနံ့ကိုသာ ကြိုက် မကြိုက် ဆုံးဖြတ် လေ့ ရှိ ပါတယ်။
ဒါဟာတကယ်တော့မှားယွင်းတဲ့ အလောတကြီး ဆုံးဖြတ်မှုပဲ ဖြစ်ပါတယ်။
ရေမွှေးရနံ့များမှာ မတူညီတဲ့ လျှို့ဝှက်ချက်ကိုယ်စီ ရှိကြပါတယ်။
.............................................................................
ရေမွှေးတစ်ဗူးမှာ ရေမွှေးဆီပမာဏ 15% -25% လောက် ကို Alcohol (သို့) ရေ နဲ့ ရောစပ်ထားတဲ့ အပြင်းစား ရေမွှေးကို Parfum ခေါ်ပါတယ်။
ဒီထက် ရေမွေးဆီပမာဏပါဝင်မှု့နဲ တဲ့ ရေမွှေး အမျိုးအစား ကိုတော့ Edu Type လို့ခေါ်ပါတယ်။
Edu မှာ ကိုပဲ EF, EDT, EDPနဲ့ EDC ဆိုပြီး ထပ်ခွဲထားပါတယ်။
ဒါဆို EF, EDT,EDP & Parfum ရဲ့ ရေမွှေးဆီ ပါဝင်နှုန်းလေး ကိုကြည့်ရအောင်
Eau Fraiche ------------ (Usually 3% or less perfume oil)
Eau de cologne --EDC (2-5% perfume oil)
Eau de toilette----EDT (4-10% perfume oil)
Eau de parfum ---EDP (8-15% perfume oil)
Soie de Parfum ------- (15-18% perfume oil)
Parfum ---------------- (15-25% also sometimes referred to as Extract or
Extrait)
Perfume oil ----------- (15-30% perfume oil in an oil rather than alcohol
base)
စျေးကွက်မှာ နေ့စဉ်သုံး ရေမွှေးတွေမှာတော့ EDT & EDP ကိုအများဆုံးတွေ့ရပါတယ်။
Parfum ကို ဆွတ်ထားမယ်ဆိုရင်တော့ ၆-၈ နာရီ အနံ့ ကောင်းကောင်းစွဲနေမှာဖြစ်ပြီး
EDP အမျိုးအစားကို ဆွတ်ထားမယ်ဆိုရင် ၃-၅ နာရီ လောက် အနံ့ စွဲစေပါတယ် ။
EDT အမျိုးအစားကတော့ ၂-၄နာရီလောက် အနံ့ကောင်းကောင်း စွဲစေပါတယ်။
အားလုံး နဲ့ မတူတာကတော့ Mist ပါ။ Mist က ခန္ဓာကိုယ် အရေပြားပေါ် နဲ့ ဆံပင် တံတောင် တို့ကို ဆွတ်လို့ရပါတယ်။ ဒါပေမယ့် သူက တော့ အခြားရေမွှေးတွေလို အချိန်ကြာမြင့်စွာ မခံပါဘူး
ကဲဒီလောက်ဆို ကွာခြားချက်လေးကို သိလောက်ပြီလို့ထင်ပါတယ်။
လိုအပ်ချက်များရှိရင် နားလည်ပေးကြပါလို့ တောင်းဆိုလိုက်ပါတယ်
အားလုံးမှန်ကန်သော ရေမွှေးလေးတွေ ရွှေးချယ်နိုင်ပါစေ၊၊
