18/09/2026
Bein leið, gatan liggur greið,
bein leið, gatan liggur greið.
Það kostar svita og blóð
að fara þessa slóð...
Í þessu myndbandi fjalla ég um skynvillu í púttum - það er, hvernig við skynjum og sjáum beinu línuna.
Sýnt hefur verið fram á að meginþorri kylfinga miðar til hægri við það sem þeir ætla sér, og það er einmitt sú reynsla sem ég hef úr kennslunni. Ég ætla að leyfa mér að segja að nánast allir kylfingar miði rangt - og langflestir of mikið til hægri. Skekkjan getur verið allt frá því að vera lítilsháttar yfir í að vera svo mikil að maður trúir varla því sem maður mælir.
En af hverju gerist þetta? Skekkjan kemur til af skynvillu. Kylfingar skynja „beint“ einfaldlega rangt. Ástæðan er sú að við stöndum til hliðar við boltann og horfum upp línuna úr ákveðnu horni. Svo til að bæta gráu ofan á svart hreyfum við flest höfuðið, lítum upp og opnum jafnvel axlirnar þegar við horfum eftir línunni... eða hinni meintu línunni.
Til að vinna gegn skynvillunni þurfum við að finna skekkjuna og laga uppsetninguna yfir boltanum. Auk þess að laga líkamsstöðuna - sem er grunnurinn - eru hér nokkur atriði sem geta hjálpað þér að miða rétt:
* Nýttu línuna á boltanum: Stilltu línunni á boltanum upp þegar þú stendur fyrir aftan púttið (þar sem skynvillan er ekki til staðar). Þegar þú stendur svo yfir boltanum stólar þú á línuna, óháð því hvað augun reyna að telja þér trú um. Ef það er ekki lína á þeirri tegund bolta sem þú notar, teiknaðu hana þá á hann.
* Rétt lögun á pútter (púttermátun): Lögun púttera getur haft sjónræn áhrif á það hvernig við skynjum línu, t.d. hvort við notum stóran mallet-pútter eða blað-pútter. Þá geta mismunandi miðmerki (línur eða punktar) haft áhrif. Með öðrum orðum: réttur pútter getur minnkað skynvilluna.
* Veldu þér nær-mið: Skynvillan eykst eftir því sem púttið lengist. Í stað þess að miða á holuna eða miðpunkt við hlið hennar, veldu þér blett sem liggur á réttu línunni milli þín og miðpunktsins - gerðu þetta þegar þú stendur fyrir aftan boltann og horfir upp línuna. Bletturinn getur verið grasstrá sem hefur annan lit, gamalt boltafar eða annað á flötinni sem sker sig úr, um 20–40 cm fyrir framan boltann. Þegar þú stillir þér upp miðar þú á blettinn, sama hvað hausinn á þér reynir að segja þér.
* Sjónró og höfuðstaða: Passaðu að augun séu beint yfir eða aðeins innan við boltann. Þegar þú lítur upp línuna, snúðu þá höfðinu eins og á öxli í stað þess að „lyfta“ því upp - það kemur í veg fyrir að axlirnar opnist. Festu svo augun á einum punkti á boltanum og haltu þeirri festu í gegnum höggið.
Viltu læra? Verða betri? Hafðu þá samband við karlinn og við finnum okkur tíma.
📞Síminn er 820 9111.
Komdu inn að leika…
…með beinu leiðina!
