SKOR - Píla & Bar

08/05/2026

Við höfum opnað nýjan og glæsilegan stað í Hafnarstræti 18!
Við erum að tala um 14 pílubása!
Við erum að tala um glæsilegt risastórt Karioke herbergi!
Við erum að tala um tvo bari á tveimur hæðum!
Við erum að tala um alvöru skemmtun!

Opið allar helgar frá 12:00-01:00
Virkir dagar 12:00-23:00

Hægt er að bóka á skorbar.is

Gæti verið gaman!

08/12/2025

🍔🍔🍔
Eldhúsið er opið frá 18:00-21:30 þri-lau 🍻🍻

15/10/2024

VINNUSTAÐASÓSJALL - 360° heildarlausn til að hrista hópinn saman 🪩

Allir vita að SKOR er nútímalegur pílubar sem starfar á krossgötum nýjustu vísinda og hefðbundins knæpureksturs. Við segjum stundum að vísindastarf sé hornsteinn okkar reksturs, þess samfélags sem við tilheyrum og í raun þess lýðræðis sem tryggir tilverurétt SKOR 🔬

Við höfum lagt okkur fram við að beita nútímatækni og vísindum, m.a. við mælingar á rennslishraða á öllum okkar bjórdælum. Þá má geta þess að pílutölvur okkar keyra á íslensku hugviti og erlendum vélbúnaði. Þannig má segja að við SKOR sé fullur þátttakandi í alþjóðasamfélaginu, en við trúum því að opin viðskipti þvert á landamæri séu forsenda lífsgæða. Lífsgæða eins og þeirra að gæða sér á ísköldum kranabjór og kasta pílum á tölvustýrt píluspjald í góðra vina hópi.

Nýjustu rannsóknir benda til þess að ákjósanlegt sé að launamenn séu glaðir og líki vel við samstarfsfólk sitt. Í vísindunum fellur þetta jafnan undir hugtak sem kallað er ‘fyrirtækjamenning’. Almennt er talið að mannleg samskipti séu undirstaða góðrar ‘fyrirtækjamenningar’. Góðir samskiptahæfileikar yfirmanna og starfsmanna bæta heilsu og líðan allra innan fyrirtækisins. Vinnustaðir þar sem samskipti eru góð auka líkur á því að frammistaða verði góð og markmið náist (Cooper og Sutherland, 1997). Leiða má líkur að því að reglulegar uppákomur séu forsenda þess að bæta samskipti innan fyrirtækja.

Án þess að kafa mikið dýpra þá hefur mannauðsráðgjafi SKOR komist að þeirri niðurstöðu að það væri óábyrgt af SKOR að leggja ekki sitt að mörkum til að bæta fyrirtækjamenningu landsins á tímum kulnunar, hamfarahlýnunar og brotthættrar heimsmyndar.

Við kynnum því með stolti: VINNUSTAÐASÓSJALL - 360° heildarlausn til að hrista hópinn
saman. Um er að ræða nýjung á íslenskum markaði. Sveigjanlegar lausnir fyrir alla hópa sem innihalda afþreyingu, drykkjarföng og fæði, allt eftir atvikum.

Vertu ábyrgjur stjórnandi. Vertu í liði með vísindunum. Hafðu samband við okkur fyrir 360° lausnir í vinnustaðamóral.

SKOR
- fyrir fyrirtækin í landinu

Eins og keila, nema píla

05/09/2024

🇩🇰 Danskir dagar á SKOR 🇩🇰

Til að fagna tilvonandi opnun Skor á Fjóni, munum við fagna helginni að dönskum sið - og dönskum verðum (Jótlandsverðum)

🍻Ótrúleg verð út sunnudaginn. Vi ses🍻

Carlsberg 1100kr
- Kanna 4500kr

Tuborg classic 1100kr
- Kanna 5500kr

Ostborgari 1000kr
- Ekta american/danish

SKOR er pílubar í á Hafnartorgi sem gengur fyrir nútíma tölvutækni. Eins og keila, nema píla

17/11/2023

Tilkynning frá stjórn SKOR og aðrar almennar fréttir

Minna gaul, meira darts

Í nýútkominni skýrslu Heilbrigðiseftirlits Reykjavíkur kemur fram að heilbrigðisfulltrúi hafi greint söng gesta frá karókí-herbergi Skor. Við þessa rannsókn var beitt nýjustu tækni í svokölluðu skynmati og greindu fulltrúar bæði nýleg Eurovision-lög sem og amerísk dægurlög í íbúðum að Kolagötu 1.

Stjórn SKOR fagnar þessari framþróun í mælingum hjá Reykjavíkurborg, enda er það þekkt staðreynd að almennt er ekkert að marka hljóðmæla og hljóðverkfræðingar eru alltof dýrir.

Í ljósi þess hefur Reykjavíkurborg nú innsiglað karaoke herbergið á Skor, og verður af þeim sökum því miður ekki hægt að bóka karókí á SKOR næstu misseri.

En slæmum fréttum fylgja jafnan góðar og það gleður okkur að tilkynna að opnunartími SKOR hefur verið framlengdur til klukkan 23:00 um helgar (í stað 22).

Baráttan fyrir pílufrelsi og því að hafa almennt gaman heldur áfram og munum við halda ykkur og öðrum hagsmunaaðilum upplýstum næstu vikur og mánuði.

Nú er hægt að bóka 25 mínútur í pílu
Vegna fjölda fyrirspurna höfum við opnað fyrir styttri tímabókanir á kvöldin fimmtudaga, föstudaga og laugardaga, eða 25 mínútur til viðbótar við möguleikana á 55 eða 80. Þessi breyting hefur mælst vel fyrir hjá tekjustýringarteymi SKOR sem gerir ráð fyrir stórfelldum vinsældum þessarar nýju þjónustuleiðar. Bókanir fara fram á vefnum eins og ávallt, einfaldlega skal velja þar 30 mínútur í tímalengd.

SKOR er pílubar í á Hafnartorgi sem gengur fyrir nútíma tölvutækni. Eins og keila, nema píla

25/04/2023

Kæra samferðarfólk,

Eftir þrotlausa vinnu, átakafundi og krefjandi samningalotur undanfarin misseri hafa stjórnir SKOR og SMASS náð samningum: hinir geysivinsælu hamborgarar frá SMASS eru nú fáanlegir á SKOR Hafnartorgi.

Við erum að tala um það sem á ensku er kallað “POP UP”. Við köllum þetta reynslutímabil og tilgangurinn er að kanna hugi og hjörtu viðskiptavina til þess hnossgætis sem eldhugarnir hjá SMASS hafa upp á að bjóða.

Við erum að tala um ostborgara. Við erum að tala um SmokeSmass. Við erum að tala um laukhringi, úrval fyrsta flokka kjúklingavængja og franskar sem ekkert jafnast á við. Við erum að tala um samstarf tveggja metnaðarfyllstu fyrirækjanna í afþreyingar- og veitingaiðnaði höfuðborgarinnar.

Verið hjartanlega velkomin á veitingastaðinn SKOR. Opið mánudaga til fimmtudaga 11:30-23:00, föstudaga og laugardaga 11:30-01:00 og sunnudaga 16:00-23:00.

SKOR
- Öruggur staður að vera á

05/04/2023

Regnið bankar á rúðurnar. Vifturnar í pílutölvunum mala sinn söng. Hvínið í rafbílunum sem þjóta um Geirsgötuna býður góða páska. Veitingastaðurinn SKOR Hafnartorgi óskar súkkulaðigrísum landsins gleðilegra páska.

Eins og vanalega munum við leggja áherslu á notalega stemningu í huggulegu umhverfi alla páskana. Við hvetjum páskabörn landsins til að gera sér notalegan dag og hrista af sér páskastressið með pílukasti og jafnvel einum eða tveimur kaffibollum eða ölkrúsum.

Opnunartímar eru eftirfarandi:
miðvikudagur: 11.30 - 01.00
fimmtudagur: 11.30 - 01.00
föstudagur: 11.30 - 01.00
laugardagur: 11.30 - 01.00
sunnudagur: lokað
mánudagur: lokað

SKOR
- rólegt og rómantískt

06/02/2023

BRÉF FRÁ FORSTJÓRA

Kæru hagsmunaaðilar,

Nú er nýtt ár gengið í garð og við hæfi að farið sé yfir stöðuna og litið yfir farinn veg. Við ætlum að tala hreina íslensku. Árið 2022 var ár umbóta í sögu SKOR. Umbætur í þágu gesta. Umbætur í þágu nágranna SKOR. En umfram annað umbætur í þágu samfélagsins.

Í þágu fagurfræði og notarlegheita réðumst við í umfangsmiklar úrbætur í nánu samstarfi við marga af fremstu sérfræðingum á sínu sviði eins og Balla arkitekt, Kjaran gólfteppaverslun og Torfa.

Gegnumgangandi verkefni allt árið var viðhald á fullnægjandi rennsli Peroni dælna. Þar var árangri náð og tala einhverjir um að árið hafi verið ein samfelld sigurganga hvað þetta varðar. Því miður var sú ákvörðun tekin að skerða framboð af Guinness á krana vegna ófullnægjandi eftirspurnar. En þegar einar dyr lokast opnast aðrar og Úlfrún Session IPA er nú fáanlegur á krana alla daga frá morgni til kvölds, hrímkaldur og ólbeiskur.

Í þágu hljóðvistar í rýminu og í raun Hafnatorgi öllu var ráðist í aðgerðir sem snerta frágang á lofti, hurðir í karókí rými og hátalarafestingar svo eitthvað sé nefnt. Þar ber að þakka eldhugum eins og Dóra smið, Ragnari hljóðverkfræðingi og Leon hjá Soundproofingsolutions.co.uk sem unnu sannkallað stórvirki við oft erfiðar aðstæður.

Í þágu bæði gesta og rekstrarniðurstöðu bættum við nýverið við tveimur píluspjöldum, smíðuðum úr fyrsta flokks byggingatimbri. Þessar breytingar munu ekki koma niður á sætaaðstöðu þeirri sem frá var látin víkja þar sem nýju og glæsilegu háborði var bætt við í miðju rýminu, smíðuðu úr fyrsta flokks byggingatimbri og þakið með einhverju slitsterkasta lakki sem völ er á. Kunnum við Sunnutorgi ehf, BYKO og fleirum bestu þakkir fyrir samstarfið.

Kæru hagsmunaaðilar og aðrir borgarbúar. Hér er hlaupið á hundavaði yfir þann mikla árangur sem liðið ár bar með sér. Öllum ætti að vera ljóst að með þessu áframhaldi stefnir í farsælasta ár SKOR frá upphafi. Fyrir hönd stjórnar SKOR óskum við ykkur velfarnaðar á nýju ári og hlökkum gífurlega til áframhaldandi og árangursríks samstarfs.

Góðar kveðjur,
forstjóri SKOR

SKOR
Engin vandamál, bara lausnir

02/09/2022

Rauð viðvörun!

Miklar sögusagnir hafa grasserað á samfélagsmiðlum undanfarið og nú getum við með gleði í hjarta staðfest að SKOR Enterprise og Veðurstofan hafa náð samkomulagi um að halda Sömmer Bombay tilboðinu út miðjan september!

Samningur var undirritaður rétt í þessu eftir ítarlega gæðaskoðun á drykknum og tölfræði teymi SKOR búið að fara yfir öll gögn Veðurstofunnar.

Virðingarfyllst,
Director of Darts

06/06/2022

Lokað í dag vegna skemmtunar starfsmanna.