Síldarvinnslan hf.

02/06/2026

Ferskt og gott hráefni skapar mikla möguleika

Vísir í Grindavík rekur bæði frystihús og saltfiskverkun. Hér verður stuttlega gerð grein fyrir starfsemi frystihússins.

Ómar Enoksson, rekstrarstjóri frystihússins, upplýsti að í húsinu gengi allt smurt og vel og væri festa í starfseminni. ”Í frystihúsinu starfa um 65 manns. Uppistaða starfsfólksins er fólk af erlendum uppruna en margt af því hefur búið lengi hér á landi og hefur orðið mikla reynslu af fiskvinnslustörfum. Frá áramótum hefur frystihúsið tekið á móti um 4000 tonnum til vinnslu og er þá helst um þorsk, ýsu og ufsa að ræða. Nánast allt hráefnið kemur frá skipum Síldarvinnslusamstæðunnar, en það eru Vestmannaey VE, Bergey VE, Birtingur NK, Páll Jónsson GK, Sighvatur GK og Fjölnir GK. Hráefnið berst til okkar ferskt og gott og það skapar okkur mikla möguleika. Þá skiptir nálægðin við alþjóðaflugvöll afar miklu máli og því er lögð mikil áhersla á framleiðslu ferskra afurða auk frystra. Á síðustu árum hefur hlutfall ferskra flaka og bita í framleiðslunni hækkað mikið. Frystihúsið er búið fjölbreyttum tækjabúnaði til framleiðslu og því getum við framleitt margs konar afurðir og það má alveg segja að framleiðsluvalkostirnir séu býsna margir,” sagði Ómar Enoksson.

Myndatexti: Frá frystihúsi Vísis í Grindavík. Ljósm. Jón Steinar Sæmundsson

01/06/2026

Síldarvinnslan hf. og Afl og Orka ehf. undirrita samstarfssamning um mögulegar virkjunarframkvæmdir í Fannardal

Síldarvinnslan hf. og Afl og Orka hf. hafa undirritað samstarfssamning um undirbúning og uppbyggingu lítillar vatnsaflsvirkjunar í Fannardal. Fyrsti áfanginn er að fara í grunnrannsóknir á virkjunarkostinum. Vonir standa til að virkjunin verði með uppsett afl allt að 6 MW og framleiði endurnýjanlega orku inn á dreifikerfið þegar hún verður komin í rekstur.

Síldarvinnslan hf. festi kaup á jörðinni Fannardal á árinu 2022. Fjórar ár eru í Fannardalslandi og eru þær vatnsmiklar.

Verkefnið er liður í orkuskiptum Síldarvinnslunnar og miðar að því að styrkja aðgengi félagsins að endurnýjanlegri og umhverfisvænni orku til framtíðar. Síldarvinnslan hefur á undanförnum árum lagt aukna áherslu á sjálfbærni, ábyrgan rekstur og markviss skref í átt að minna kolefnisspori.

Afl og Orka var stofnað árið 2024 og sérhæfir sig í uppbyggingu og rekstri lítilla vatnsaflsvirkjana víða um land. Félagið er í jafnri eigu HS Orku og Rafal og leggur ríka áherslu á samfélagslega ábyrgð, vandaðan undirbúning framkvæmda og góða umgengni um náttúru og menningarleg verðmæti.

„Þessi samningur er mikilvægt skref í orkuskiptum Síldarvinnslunnar og fellur vel að þeirri stefnu okkar að byggja upp traustan og ábyrgan rekstur til framtíðar. Aðgengi að endurnýjanlegri orku skiptir sífellt meira máli fyrir íslenskan sjávarútveg, bæði út frá umhverfissjónarmiðum og rekstraröryggi. Við sjáum í þessu verkefni tækifæri til að styrkja innviði okkar með ábyrgum hætti, í góðu samstarfi við aðila sem leggja áherslu á fagmennsku og virðingu fyrir umhverfi og samfélagi. Við teljum mikilvægt að við Íslendingar nýtum þá kosti sem við eigum til að afla okkur endurnýjanlegrar grænnar orku,“ segir Gunnþór Ingvason, forstjóri Síldarvinnslunnar.

Aðilar munu á næstunni hefja rannsóknir og undirbúning verkefnisins, nánari útfærslu og í kjölfarið verður farið í að afla nauðsynlegra leyfisveitinga í samræmi við lög og reglur. Allt að þrjú ár geta liðið þar til niðurstöður um ákvörðun um að fara í næsta áfanga liggja endanlega fyrir.

Myndatexti: Gunnþór Ingvason, forstjóri Síldarvinnslunnar og Friðrik Friðriksson, stjórnarformaður Afls og Orku ehf., við undirritun samstarfssamningsins

Útgerðar- og fiskvinnslufyrirtæki

01/06/2026

Saltfiskurinn á bestu markaði í sunnanverðri Evrópu

Hjá Vísi í Grindavík er bæði rekin saltfiskvinnsla og frystihús. Hér verður gefin örlítil innsýn í starfsemina í salthúsinu.

Saltfiskverkun Vísis hefur verið rekin í sama húsinu frá því að fyrirtækið var stofnað árið 1965 en byggt var við húsið um aldamótin 2000. Vélbúnaður í salthúsinu hefur tekið miklum breytingum í gegnum tíðina og er framleiðslan nú mjög tæknivædd. Heimasíðan ræddi við Jón Steinar Sæmundsson verkstjóra í salthúsinu og bað hann um að segja í fáum orðum frá starfseminni. “Hér í salthúsinu vinna um 50 manns og að auki starfa 10 manns í svonefndu Gjögurhúsi sem er slægingar- og pökkunarhús. Mikill meirihluti starfsfólks er af erlendum uppruna og þetta fólk hefur flest starfað lengi hjá fyrirtækinu. Ég gæti trúað að meðalstarfsaldur þess sé 10 – 15 ár. Starfsmannaveltan er ótrúlega lítil. Stór hluti þessara starfsmanna átti orðið húsnæði í Grindavík áður en bærinn var rýmdur en fólkið hefur haldið áfram að starfa hjá okkur eftir rýmingu. Það sem af er ári hefur verið tekið á móti um 4000 tonnum af hráefni hjá okkur. Hráefnið skiptist þannig eftir tegundum; um 3000 tonn þorskur, um 800 langa og rúmlega 200 ufsi en lítið af örðrum tegundum. Frá áramótum höfum við pakkað um 2000 tonnum af fullunnum saltfiski. Stærstu markaðirnir fyrir saltfiskinn okkar eru Ítalía, Spánn, Grikkland og Portúgal, en þessir markaðir í sunnanverðri Evrópu eru þeir bestu. Línufiskurinn fer mest á ítalíu, Spán og Grikkland en togarafiskurinn fer á Portúgal. Starfsemin hjá okkur hér í salthúsinu hefur gengið afar vel og það er skemmtilegt að fylgjast með því hve eftirspurnin eftir framleiðsluvörunni okkar er mikil,” sagði Jón Steinar.

Myndatexti: Frá salthúsi Vísis í Grindavík. Ljósm. Jón Steinar Sæmundsson

29/05/2026

Vestmannaey og Bergey landa í Neskaupstað

Vestmannaeyjatogararnir Vestmannaey VE og Bergey VE lönduðu í Neskaupstað í gær og í dag að loknum stuttum veiðiferðum. Vestmannaey landaði í gær um 60 tonnum af ýsu og þorski og sagði Birgir Þór Sverrisson skipstjóri að vel hefði gengið að veiða. ”Við byrjuðum á Undirbyrðishrygg sunnan við Hvalbakinn en fórum svo í Litladýpið þar sem fékkst ágætur þorskur. Í túrnum var suðvestan kaldi og heldur þungur sjór,” sagði Birgir Þór.

Bergey kom síðan að landi í morgun með fullfermi og var aflinn mest ýsa og þorskur. Jón Valgeirsson skipstjóri var sáttur við túrinn. ”Þetta var ágætis kropp. Við tókum fyrsta holið við Þorskhausinn, sem er á Breiðdalsgrunni austur af Hvalbaknum. Síðan vorum við að veiðum við Hvalbakinn allan tímann og þetta gekk bara vel,” sagði Jón.

Vestmannaey hélt á ný til veiða í gærkvöldi og Bergey mun halda til veiða síðdegis í dag eða í kvöld.

Myndatexti: Landað úr Vestmannaey VE í Neskaupstað. Ljósm. Smári Geirsson

28/05/2026

Línuskipin með þokkalegasta afla

Línuskip Vísis hafa bæði nýverið landað þokkalegasta afla í heimahöfn í Grindavík. Sighvatur GK landaði um 80 tonnum í gær og var Aðalsteinn Rúnar Friðþjófsson skipstjóri ánægður með túrinn. “Nú er hafin sumarveiði og þá er ekki jafn mikill afli og yfir vertíðartímann en þetta var engu að síður þokkalegasti túr. Aflinn fékkst í fimm og hálfri lögn. Við byrjuðum á Belgableyðunni, síðan var haldið á Kóralhornið og endað við Melsekk. Uppistaða aflans var keila og langa og síðan var dálítill karfi með. Þetta var virkilega fínn fiskur. Það var fínasta veður allan túrinn og ekki yfir neinu að kvarta,” sagði Aðalsteinn Rúnar.

Sighvatur hélt á ný til veiða í gærkvöldi.

Í morgun var síðan landað um 70 tonnum úr Páli Jónssyni GK. Benedikt Jónsson skipstjóri var sáttur við aflabrögðin þegar tekið er tillit til aðstæðna og kvótastöðu. ”Það er engin veisla í veiðum á þessum árstíma og svo er kvótinn farinn að dragast saman hjá okkur en við fengum hins vegar flottan fisk í túrnum. Aflinn var mest keila og langa. Ég held að meðalvigtin á löngunni hafi verið um 10 kg. og meðalvigt á keilunni um 3 kg. Það er mjög gott. Við vorum einnig með svolítið af ýsu og dálítið af þorski. Við byrjuðum á að fara austur í svonefnt Ingólfshöfðahólf. Hólfið var lokað í yfir 20 ár en var opnað nýlega. Það er fyrirhafnarmikið að veiða í hólfinu. Þar er lagt í stubbum undan straumi og botninn er mjög erfiður. Lagnirnar í túrnum voru fjórar og hálf. Tvær og hálf voru teknar í hólfinu og síðan tvær á Kötlugrunni. Á Kötlugrunni fékkst góður afli en það var þó heldur mikið af löngu í aflanum. Annars erum við á Páli Jónssyni hinir hressustu,” sagði Benedikt.

Páll Jónsson hledur á ný til veiða í kvöld.

Myndatexti: Landað úr Páli Jónssyni GK. Ljósm. Jón Steinar Sæmundsson

26/05/2026

Nú landa Vestmannaeyjaskipin fyrir austan

Vestmannaeyjatogararnir Vestmannaey VE og Bergey VE hafa landað fullfermi í Neskaupstað í gær og í dag. Vestmannaey landaði í gær og hélt til veiða strax að löndun lokinni. Í kjölfar Vestmannaeyjar kom Bergey einnig til hafnar í gær og hófst löndun úr henni í morgun. Heimasíðan ræddi við skipstjórana og fékk að heyra fréttir af gangi veiðanna. Birgir Þór Sverrisson, skipstjóri á Vestmannaey, sagði að túrinn hefði að mestu einkennst af reitingsveiði. ”Aflinn var mest ýsa og dálítill þorskur með. Við byrjuðum á að taka eitt hol á Víkinni, síðan var keyrt á Höfðann og tekin tvö hol þar. Þaðan var haldið í lónsbugtina og endað var á Undirbyrðishrygg eða nyrst á Papagrunni. Við höfum gjarnan veitt úti fyrir suðausturlandi að lokinni vetrarvertíð en af og til þó veitt fyrir vestan eins og þegar þurft hefur að sækja karfa. Fiskurinn sem við erum með núna er þokkalegur miðað við árstíma. Við reiknum með að vera tvo næstu túrana úti fyrir suðausturlandinu og eltast þar við ýsu. Reyndar höfum við alloft haldið okkur á þessum suðausturmiðum einnig í júnímánuði,” sagði Birgir Þór.

Jón Valgeirsson, skipstjóri á Bergey, sagði að vel hefði gengið að fiska eftir að austur var komið en í byrjun túrs hefði verið reynt við ufsa með litlum árangri. ”Aflinn í túrnum var að mestu ýsa og það veiddist vel af henni undir lok túrsins. Við byrjuðum á Víkinni og fengum aðeins þorsk þar. Síðan var reynt við ufsa í Reynisdýpi, Kötlugrunni, Síðugrunni og Skeiðarárdýpi með heldur dapurlegum árangri. Loks var keyrt austur á Undirbyrðishrygg og þar var hörkuýsuveiði. Þessi túr tók þrjá sólarhringa höfn í höfn og gekk vel þó svo að tími færi í að leita að ufsanum. Við munum halda til veiða á ný fljótlega eftir löndun og ekki er ósennilegt að við förum á svipaðar slóðir og við enduðum á í síðasta túr. Við munum taka tvo til þrjá túra fyrir sjómannadag og ekki er ósennilegt að við höldum okkur á miðunum úti fyrir landinu suðaustanverðu,” sagði Jón.

Myndatexti: Vestmannaey VE og Bergey VE mætast á Norðfirði í gær. Ljósm. Smári Geirsson

21/05/2026

Línuskipin leggja áherslu á löngu og keilu

Línuskip Vísis í Grindavík, Sighvatur GK og Páll Jónsson GK, leggja um þessar mundir áherslu á að veiða annað en þorsk og er athyglinni einkum beint að löngu og keilu. Sighvatur landaði um 80 tonnum í heimahöfn í gær og í morgun landaði þar Páll Jónsson 83 tonnum. Heimasíðan ræddi stuttlega við skipstjórana . Óli Björn Björgvinsson, skipstjóri á Sighvati, sagði að túrinn hefði einkennst af nuddi. „Þetta var óttalegt nudd. Það er stórstreymt núna og þorskurinn að hverfa. Við byrjuðum túrinn með tveimur lögnum úti á Skerjum sem eru suðvestur af Eldey. Í kjölfarið voru síðan teknar fjórar lagnir á Eldeyjarbankanum. Á þessum árstíma er reynt að forðast þorskinn og var aflinn blandaður, en mest var af löngu. Ég geri ráð fyrir að á næstunni verði í ríkum mæli sótt austureftir í þeirri von að langa og keila gefi sig þar,“ sagði Óli Björn.

Benedikt Jónsson, skipstjóri á Páli Jónssyni, sagði að þetta hefði verið fyrsti túr að lokinni vélarupptekt sem tók liðlega þrjár vikur. „Það var heldur lítið um að vera í þessum túr sem farinn var eftir nokkurt hlé. Við vorum úti á Jökultungu en þangað var haldið til að blanda aflann. Þetta voru s*x lagnir og aflinn var frá 10 – 13 tonnum í lögn. Mest var af löngu og keilu í aflanum og menn voru ánægðir með það. Það var fínasta veður allan túrinn,“ sagði Benedikt.

Sighvatur hélt til veiða á ný í gærkvöldi og Páll Jónsson mun láta úr höfn í kvöld.

Myndatexti: Páll Jónsson GK. Ljósm. Jón Steinar Sæmundsson

20/05/2026

Fjölnir kominn austur

Krókaaflamarksbáturinn Fjölnir GK er kominn austur til Neskaupstaðar og hefur róið þaðan síðustu dagana. Fjölnir er 30 tonn að stærð og tilheyrir Vísisflotanum í Grindavík. Síðustu árin hefur Fjölnir gjarnan róið frá Neskaupstað um tíma á vorin og haustin. Heimasíðan sló á þráðinn til Kristins Arnbergs Kristinssonar skipstjóra og spurði frétta. “Af okkur er allt gott að frétta. Við lönduðum í fyrsta sinn í Neskaupstað á laugardaginn en lönduðum reyndar á Djúpavogi á leiðinni hingað austur. Við erum í fimmta túrnum hér eystra núna og það er búin að vera ljómandi góð veiði. Þá hefur verið bongóblíða alveg frá því við komum. Fiskurinn sem fæst hér eystra er virkilega flottur. Eftir að við komum austur til Neskaupstaðar höfum við róið tvisvar á Gerpisgrunn, einu sinni í Seyðisfjarðardýpið og tvisvar í Héraðsflóann. Við erum einmitt í Héraðsflóanum í dag og það eru um það bil 25 mílur að bryggju í Neskaupstað. Aflinn hefur verið frá 9 tonnum og upp í 16 tonn hér eystra og við getum ekki kvartað yfir aflabrögðunum. Þetta hefur í reynd bara gengið eins og í sögu,” sagði Kristinn Arnberg.

Myndatexti: Fjölnir GK siglir inn Norðfjörð í gær. Ljósm. Guðlaugur Björn Birgisson

19/05/2026

Stuttir túrar hjá Vestmannaeyjaskipunum

Það sem af er þessum mánuði hefur veiði verið góð hjá Vestmannaeyjatogurunum Vesatmannaey og Bergey. Veiðiferðirnar hafa verið stuttar eða tveir til þrír sólarhringar og hefur yfirleitt verið komið með fullfermi að landi. Oftast hefur verið landað í Grindavík en einnig í Þorlákshöfn og í Eyjum. Bæði skipin lönduðu fullfermi í gær, Vestmannaey í Grindavík og Bergey í Eyjum. Heimasíðan heyrði hljóðið í skipstjórunum. Egill Guðni Guðnason, skipstjóri á Vestmannaey, var ánægður með aflabrögðin upp á síðkastið. “Það hefur gengið vel að veiða að undanförnu. Túrarnir hafa verið stuttir en þessi túr var þó þrír og hálfur sólarhringur, enda veðrið ekki sérstaklega skemmtilegt. Það voru 20 – 25 metrar í eina tvo sólarhringa og töluverð leiðindi. Nú er einnig farið að líða á kvótaárið og þá er ekki unnt að veiða hvaða tegund sem er. Að þessu sinni hófum við veiðar í Háfadýpi, síðan var haldið á Broadway og þaðan í Grjótið vestan við Garðskaga. Túrinn var síðan kláraður við Eldeyna,” sagði Egill Guðni.

Ragnar Waage Pálmason, skipstjóri á Bergey, var einnig ánægður með aflabrögðin að undanförnu. “Það hefur gengið vel að fiska allan þennan mánuð. Veiðiferðirnar hafa verið stutter og við höfum landað í Grindavík þar til nú að landað er í heimahöfn. Það var heldur leiðinlegt veður í þessum túr enda tók hann um þrjá og hálfan sólarhring. Aflinn núna var mest langa og síðan var þetta bland af ýmsu. Við hófum veiðar á Pétursey í kaldafýlu. Þaðan var haldið á Ingólfshöfða þar sem var nudd. Síðan var tekið eitt hol í Reynisdýpinu og loks klárað á Vík og Pétursey. Það er verið að eltast við ákveðnar tegundir eins og ávallt þarf að gera í lok kvótaárs,” sagði Ragnar Waage.

Myndatexti: Vestmannaey VE kemur til löndunar í Grindavík. Ljósm. Jón Steinar Sæmundsson

18/05/2026

Góðri kolmunnatörn lokið

Kolmunnaveiði í færeysku lögsögunni er lokið að sinni en lengst af aflaðist mjög vel. Til Síldarvinnslunnar í Neskaupstað bárust 34.252 tonn af kolmunna í veiðitörninni. Fyrsti farmurinn kom þann 13. apríl og sá síðasti þann 13. maí. Það var grænlenska skipið Polar Ammassak sem kom með lokafarminn, 2.200 tonn. Heimasíðan ræddi við Hafþór Eiríksson rekstrarstjóra fiskimjölsverksmiðju Síldarvinnslunnar og spurði hann hvernig þessi kolmunnatörn hefði gengið. ”Hún gekk mjög vel. Hráefrnið var gott og nú var nægileg raforka til staðar þannig að ekki þurfti að nota olíu til að knýja verksmiðjuna. Það fékkst töluvert af mjöli úr kolmunnanum og um er að ræða mjög gott mjöl. Hinsvegar fæst lítið af lýsi úr fiskinum á þessum árstíma. Á meðan á framleiðslunni stóð fóru frá okkur 5.400 tonn af mjöli og einnig fóru 700 tonn af lýsi til Lýsis hf en það er nýtt til manneldisvinnslu. Líklegt er að ekki verði framleitt í verksmiðjunni á ný fyrr en seint í júlímánuði en það er nægum verkefnum að sinna fram að þeim tíma,” sagði Hafþór.

Myndatexti: Það var oft mikið um að vera á meðan á kolmunnaveiðunum stóð. Á myndinni er skip að lesta kolmunnamjöl og Beitir NK er að landa afla. Ljósm. Sigurjón Jónuson