10/02/2026
Neyðarlínan heldur upp á 1-1-2 daginn þann 11. febrúar á hverju ári því að dagsetningin 11. 2. minnir okkur á neyðarnúmer allra landsmanna, 1-1-2. Það er mikilvægt að minna á þetta númer af því þetta er eina númerið sem landsmenn þurfa að þekkja í neyð. Í ár minnumst við þess að 30 ár eru síðan samræmt neyðarsímanúmer var tekið upp á Íslandi og fyrsta símtalinu í 1-1-2 svarað 1. janúar 1996. Neyðarverðir taka á móti öllum erindum sem berast 1-1-2 og vinna úr þeim. Þau veita stuðning og leiðbeiningar og sjá til þess að málin fari í réttan farveg. Til þess að samstarf innhringjanda og neyðarvarðar gangi sem farsællegast er gagnlegt að vera viðbúinn að svara eftirfarandi spurningum þegar hringt er í 1-1-2. · Hvar er atburðurinn? · Hver ert þú? · Hvað gerðist? · Hvenær gerðist atburðurinn?
Víða um landið verða ýmsir viðburðir, en í Dalvíkurbyggð munu viðbragðsaðilar í sveitarfélaginu byrja daginn á heimsókn á leikskólann Krílakot, en svo síðar um daginn stendur íbúum til boða að koma á opin hús að Gunnarsbraut 4. Félagar í Björgunarsveitinni Dalvík og Slysavarnardeildinni Dalvík munu taka á móti gestum og gangandi milli kl. 16 og 18. heitt verður á könnunni 😊
