22/06/2023
阿棍屋告急 儲備用盡不足支持兩星期
感激善心人支援渡難關
「通關後每一日都冇人捐款，其實係好恐怖…」
#阿棍屋 日前（18日）發告急文，稱營運經費見底，是中心成立八年來首遭。嚴峻考驗還有兩座動物收容中心。馬鞍崗動物拯救中心收容近80隻需特別照顧及處方糧食的長期病患與年邁犬隻，下月開始加租；錦田新建的拯救動物中心收容逾150隻動物，聘請職員，水電糧開支亦不少。早前持續豪雨令原有的中心水浸，黃泥倒灌，圍板及簷篷經過多年風吹雨打，多處嚴重破損，阿棍屋早前曾發文籌集資金維修，本已緊絀的財政百上加斤。
去年二月阿棍屋亦曾告急，急需狗糧及藥物，另中心存倉糧食亦只餘十幾包。負責人Ivy當時接受《娛壹》訪問嘆道：「真係唔去到最底都唔嗌（告急）。」
本以為疫後復常，惜事與願違。阿棍屋決暫停營運一直零收費的 #阿棍屋善行動物診所，大部份醫療服務，以守住最後照顧動物的工作。若能捱過今次低潮，目標在三個月後重開善行診所服務，並計劃將診所轉型，希望收支平衡，繼續做好收容和領養工作，「盼讓更多不懂人語的流浪動物，最終找到一頭溫暖的家。」
【「每一日都冇人捐款…」】
阿棍屋並無政府資助，主要靠熱心人捐助、舉行活動及間中義賣，求助及棄養個案越來越多，Ivy昨日接受《娛壹》訪問表示：「疫情開始，捐款一路唔係好穩定，加上好多人移民，捐款逐啲減少，我哋係靠儲備頂住先，每個月都見到捐款減少緊。以前可能每一日都有人捐款，通關之後每一日都冇人捐款，其實係好恐怖…加上開咗唔同服務（如診所），開支大咗，已經將儲備用盡。出post嗰陣，營運經費只夠用兩個禮拜，連一個月應該付嘅經費都付唔起。」
阿棍屋收容最多是狗隻，之後是貓，還有龜，約20隻巴西龜和兩隻大龜，七隻羊，還有雀仔。動物診所今年3月正式投入服務，提供免費內外全科醫療，讓無家浪孩得到治療，暫只接受已審批合資格義工求助。負責人說：「搵醫生真係好難，好多醫生都已經離開香港，所以之前一直唔能夠提供穩定服務。」
【牠們的故事】
阿棍屋最常見動物告急文，常有動物流落街頭，阿棍屋收到市民求助、將毛孩帶返診所檢查﹐大多有長期病患或年事已高。12歲小葵婆婆是北京犬，給遺棄在屋邨平台，身上拖著一個巨型腫瘤。腫瘤切除了，還待觀察。「雖然未知道未來日子有多少，但都希望你過得開開心心。」
最近另一個案，有狗主帶著9歲的狗狗，到沙田漁記門口準備棄養，有好心人及時勸止，狗主將狗狗交給對方便離開。這小可愛最後來到阿棍屋，中心根據晶片聯絡登記人，不果。也有一些是身不由己。一對夫婦數天內先後入院，病情不輕。由於親人非同住、且家中不能飼養動物，惟向阿棍屋求助、照顧兩貓一犬。家人表示夫婦倆即使出院，自顧能力恐亦大不如前，謂若有合適領養者，希望為三個毛孩尋家。
動保組織社交平台帖文，傻瓜毛孩的笑臉配以洋蔥身世。尋家原因只有寥寥數語：繁殖場、從漁農處救出，被遺棄。新界東北發展收地，居民獲安置上樓，動物不能，由阿棍屋照顧，安置在新建的狗場，政府撥地出資興建，阿棍屋自力營運，並無資助。狗狗居住空間以玻璃磚牆相隔，半開放式設計，有樹有陽光，如《香港知埞》作者Knowhere所言：「那些陽光，空氣，樹木，走動的空間，村狗從來一直擁有，是最基本生活條件，直至收地拆村的一刻。」
阿棍屋負責人說：「呢啲狗仔之前多數都係半放養，對人類唔係好熱情，身體亦有唔少毛病，有啲曾有狗瘟，亦有啲已經中咗心絲蟲，同埋年紀都係5歲以上，已經有自己性格，被領養機會細好多。佢哋喺呢度開始適應，我哋亦都諗住照顧終老。」
【農曆年後已擔心要停運】
「過咗農曆新年之後，見到捐款數字每日遞減，個心好慌好亂，諗緊會唔會要關閉呢？始終成個社會經濟，唔係剩係我，而係成個社會好多行業都係咁。如果我自己都幫唔到自己，唔通人哋幫到你咩？始終人哋都有困難…過年後勉勉強強可以支撐落去，但而家真係冇辦法。如果6月尾我冇足夠嘅錢嘅話，我唔能夠交租，唔能夠運作，惟有試一試出post…」
「好感恩，我冇諗過呢個post得到咁多善心人支持分享，我只係抱住捱得一個月得一個月嘅心態，真係好感恩。好衷心好多謝所有支援嘅善心人，衷心感恩。你哋真係救咗阿棍屋一命，幫助呢度嘅小朋友度過一個好大嘅難關。我哋承諾繼續努力，好好幫助每一個生命﹐拯救佢哋之餘幫佢哋搵屋企；如果唔得嘅話，我哋亦會照顧佢哋終老。我哋會做好我哋嘅本份，回報你哋嘅大恩。」
【張敬軒fc豁免續會費捐助】
阿棍屋出po告急後，有心人都嚮應捐款，其中包括張敬軒歌迷會，其fc 豁免續會費，歌迷捐會費加入幫助阿棍屋行列：「張敬軒好錫fans，處處為fans着想，我哋都好錫你㗎，大家都將會費捐出去做善事，」
對此軒公回覆：「我知呀，佢哋（阿棍屋）都有send message多謝我哋。係善緣，呢一種良性循環好好。開關之後要睇吓情況，呢三年對我哋行業有好大打擊，雖然會費一年300幾蚊唔算多錢，而且仲有紀念品收。如果可以保持到歌迷會營運，咁就送多年畀佢哋啦 ！一向都有支持晤同慈善團體，希望可以集腋成裘！」
#娛壹
