Cineclube de Compostela

Casa
España
Santiago de Compostela
Cineclube de Compostela

Asociación que pon películas e cousas polo estilo, normalmente en Santiago de Compostela.

15/09/2026

A película de animación OS CANS DA PRAGA non só denuncia da crueldade cos animais ou cuestiona a nosa relación coa natureza. Tamén retrata os animais de maneira realista no plano físico mentres que equipara os seus pensamentos e emocións aos nosos.

Rowf e Snitter escapan dun centro de investigación científica situado no Distrito dos Lagos, en Inglaterra. No interior deste lugar foran sometidos polos Batas Brancas a tortuosos exames que levaron os seus corpos e mentes ao límite. Trala súa fuga son perseguidos polas autoridades, e na súa peripecia terán que interactuar con máis humanos, polo xeral seres moralmente cuestionables, ao mesmo tempo que tratan de comprender un mundo hostil.

Este mércores 16 ás 21:30 na Gentalha Do Pichel

09/09/2026

🐈 Hoxe, mércores 9, comezamos o curso no Cineclube con UN GATO NEGRO NOS ARBUSTOS, clásico do cinema de terror xaponés dirixido por Kaneto Shindō. Como é habitual, será ás 21:30 na

Nun tempo de guerras civís constantes no Xapón feudal, Yone e a súa nora Shige, que viven nunha casiña nun bosque de bambú, son agredidas, violadas e asasinadas por unha banda de samurais sen lei, que prenden lume tamén a casa. Sobre os cascallos fumegantes da casa aparecerá un gato nego, que comeza a lamber os corpos. É o primeiro sinal de que os espíritus das dúas mulleres non descansarán até atopar vinganza.

Nesta adaptación moi libre dun conto popular, o cineasta arma un filme de técnicas cinematográficas atrevidas que o achegan á vangarda, cunha fotografía moi fluída, efectos especiais para simular voos, xustaposición de planos para transmitir o sobrenatural... Elementos que fan dela un dos títulos máis eclécticos de Shindō, coñecido por obras como 'A bruxa diaño'.

08/09/2026

SETEMBRO 2026: GATOCÁN, GATOCÁN

Despois do verán, retomamos a programación no Cineclube de Compostela cun ciclo centrado nos que son quizais os animais domésticos por excelencia: gatos e cans. Así, seguindo o título (e a canción) da serie Gatocán, alternaremos entre uns e outros.

A primeira semana veremos un clásico do cinema de terror xaponés: KURONEKO, de Kaneto Shindo, adaptación dun conto popular de carácter sobrenatural con presenza clave dun gato negro.

Pasaremos aos cans con OS CANS DA PESTE, de Martin Rosen. Neste drama de animación para adultos seguimos a dous cans, Rowf e Snitter, que escapan dun laboratorio de investigación en Gran Bretaña.

O 21 de setembro retomaremos unha sesión que Alberte Pagán nos achegou durante o confinamento vendo a versión final de LIMITES: "umha olhada anti-especista ao mundo animal nom humano", na que os gatos devolven a mirada.

Por último, pecharemos cunha dobre sesión canina: MÚSICA PARA CANS, vídeo de Bill Morrison para a obra de Laurie Anderson, e a película desta coñecida música e artista multidisciplinar, CORAZÓN DE CAN, que se centra nos recordos da mesma da súa falecida cadela, pianista e pintora Lolabelle.

Cartaz da nosa socia Edí Oca

Grazas aos nosos socios protectores:
Unitaria | NUMAX | Café Bar El Muelle | Café Bar O Trece | A Medusa Pub | jatafarta | Histeria Teatro | Libraría Couceiro | Libraría de Mulleres Lila de Lilith | Flamingocompostela

29/05/2026

Ademais de ter concertos, na nosa festa de 25 aniversario teremos actividades que esperamos que vos motiven a vir celebrar con nós.

A nosa proxección de aniversario titúlase ANIMANIVERSARIO. Compilamos unha serie de curtametraxes animadas (en todos os sentidos) que conteñen cumpreanos para inspirarnos polas celebracións de xente senlleira como Pingu ou Mickey Mousa. Para todas as idades, probablemente.

Tal vez houbo un tempo no que era posible separar a cinefilia do karaoke, pero xa non nos lembramos del. No IV CONCURSO DE KARAOKE CINÉFILO, o Cineclube ofrécevos de novo a posibilidade de cantar unha selección de cancións aparecidas en películas de todos os tipos, e de facelo competindo polo premio máis honroso e emocionante: unha carta branca para programar unha sesión no propio Cineclube. O xurado que decidirá quen gaña estará este ano composto por Beta Aguilar (gañadore do III Karaoke Cinéfilo), o músico Andrés Real e o historiador e histórico cineclubista Arturo Real. Podes consultar o libreto no noso blog!

Ademais, neste aniversario faremos unha participación colaborativa no PROXECTO REMOLQUE, unha iniciativa do cineasta e proxeccionista Cris Lores na que manipularemos colectivamente un trailer en 35 milímetros.

Haberá, ademais, PIRATAS. Recomendámosvos vestirvos como tal na medida do posible.

28/05/2026

FESTA DO 25º ANIVERSARIO DO CINECLUBE DE COMPOSTELA

Ao longo do mes xa vistes que estivemos cunha programación especial co motivo de que cumprimos un cuarto de século. Neste tempo proxectamos arredor de 2000 pezas audiovisuais (podedes consultar cales na nosa lista de Letterboxd), publicamos libros e revistas, fixemos radio e tamén cine, colaboramos con moitas asociacións e festivais, traducimos unha chea de textos e subtítulos (que podedes consultar no noso blog) e acollemos a participación e a axuda de moita moita xente.

Esta festa, igual que as anteriores pero máis se cadra, é o peche a este programa de celebración, así que agardamos vervos na (se vos é posible, con outfit de pirata) para ver a EMILIO JOSÉ, COLUMNA VEGANA, MINISTRA, OS PIRATAS, botar un ollo a unha fantástica selección de curtas animadas de temática cumpreanos e, por suposto, participar no IV karaoke cinéfilo.

Mañá contámosvos máis sobre as actividades.

25/05/2026

O próximo sábado 30 celebramos a nosa festa de 25 aniversario. Teremos, como é habitual, tres concertos memorables que vos presentamos a continuación.

Este 2026 volve visitarnos, dez anos despois do seu anterior concerto no Cineclube, EMILIO JOSÉ. Explicar o que fai non é doado: en máis de vinte anos de carreira pasou por unha cantidade enorme de ferramentas e xéneros (por dicir algúns probablemente inexactos, o hip hop, a bossa nova, a electrónica, o jazz) para contar unha visión do mundo que ten a Quins (Melón) como centro e na que hai espazo para a beleza máis desarmante e a crítica ás miserias contemporáneas.

Teremos tamén a Estevo e Corbi, COLUMNA VEGANA. Son moi divertidos, pero iso non implica que non sexan serios, como Franco Battiato pero ao revés. Falan do cotián (“o horóscopo, as eleccións xerais ou o amor, o agora e o aquí”) con lucidez, e se ves velos podes rir, bailar e emocionarte, tal vez durante a mesma canción. Saíron de Mollavao, do Liceo Mutante, e veñen por primeira vez tocar ao Cineclube.

Por segundo ano consecutivo, anunciamos a MINISTRA para a festa de aniversario do Cineclube. O ano pasado non foi posible telas connosco finalmente, pero facemos propósito de emenda. Contámosvos daquela que eran un dúo de batería e guitarra definible como “trogloditas riquiñas”, e tamén que dixeran delas que “remexen ritmos primixenios con distorsión engaiolante, dando un resultado lo-fi altamente viciante”. Segue sendo certo, é cousa túa vir comprobalo.

O sábado a partir das 21:30 na Gentalha Do Pichel

18/05/2026

Este mércores temos unha sesión sorpresa para celebrar o noso 25 aniversario. O título é BINGO! 25 ANOS, 25 POSIBILIDADES, e xa o explica máis ou menos todo: escollimos 25 posibles sesións, unha por cada ano do Cineclube, e utilizaremos un bombo de bingo para escoller cal é a que veremos este mércores.

Cales son esas 25 posibilidades? Non o diremos con antelación, aínda que se ves á sesión poderás descubrilo facendo un encrucillado que incluiremos na nosa folla de sala. Poñeremos tal vez a túa sesión favorita da historia do Cineclube?

11/05/2026

Este mércores continuamos celebrando o noso 25 aniversario e facémolo cunha proxección especial por dous motivos.

Un: porque é unha proxección interactiva, na que poderedes intervir seguindo algún dos códigos que vos proporemos (tamén podedes non intervir).

O outro: porque poñemos O CUARTO (The Room), o icónico filme de Tommy Wiseau considerado "o Cidadán Kane das malas películas", que se suma así a un selecto clube de seleccións do Cineclube unidas pola mala consideración que teñen por parte do público, como "Ratatoing" de Michelle Gabriel, "Hercules" de Roswitha Haas ou "¡Que vienen los socialistas!" de Mariano Ozores.

Cal foi a peor película que vistes? E a peor película que vistes no Cineclube?

Mércores ás 21:30 na Gentalha Do Pichel

05/05/2026

O título do noso ciclo para este mes de maio, en homenaxe ao filme de Alain Tanner (que, por outra parte, non imos proxectar) é O CINECLUBE, QUE FARÁ OS 50 NO ANO 2051. Isto implica que este ano, e este mes, estaremos celebrando 25 anos.

Neste cuarto de século fixemos bastantes cousas. Principalmente puxemos películas en Santiago, pero tampouco hai que ser reducionistas, porque á parte de películas tamén temos proxectado desde todo tipo de imaxes de internet a spots electorais, e á parte de proxectar na cidade tamén o fixemos en sitios como Salvaterra de Miño, París, Liberec ou Marinaleda. Tamén fixemos varios centos de follas de sala e subtítulos, un podcast, vídeos, libros... e pasaron polas nosas sesións unha chea de artistas, cineastas e asociacións.

Para celebralo, pensamos un mes con algunhas ideas arredor deste aniversario. Aí van:

🎂 Mañá mércores proxectaremos XUBILEU, de Derek Jarman, porque a tentación de poñer unha película cuxo título xira arredor de cumprir 25 anos era demasiado grande.

✨ Como temos gana de que participedes destas celebracións, preparamos unha VISITA GUIADA A THE ROOM, na que poderedes interactuar coa mítica película de Tommy Wiseau, habitual das listas de peores filmes da historia.

🧨 Continuamos a interactividade cunha sesión sorpresa titulada BINGO! Levaremos un bombo con 25 bólas para escoller ao azar a proxección entre 25 sesións, unha por cada ano de vida do Cineclube.

🎤 Se lembrades, hai case un ano Beta Aguilar proclamouse gañadore do III Karaoke Cinéfilo do Cineclube, e o seu premio é programar esta sesión, que levará por título CUCUCHA CINEMA.

🎉 O mes pechará coa nosa tradicional festa de aniversario, na que actuarán Emilio José, Columna Vegana e Ministra, ademais dunha proxección de curtas de animación e o IV Karaoke Cinéfilo.

Compartide e a celebrar connosco!

Cartaz da nosa socia Edí Oca

Grazas aos nosos socios protectores:
Unitaria | NUMAX | Café Bar El Muelle | Café Bar O Trece | A Medusa Pub | jatafarta | Histeria Teatro | Libraría Couceiro | Libraría de Mulleres Lila de Lilith | Flamingocompostela

04/05/2026

O ciclo do noso mes de maio está dedicado a celebrar o 25º aniversario do Cineclube de Compostela, e abrímolo cunha película que parte doutro 25º aniversario: o do reinado de Isabel II de Inglaterra, tan celebrado no seu momento como criticado e parodiado polo punk.

XUBILEU é a segunda longametraxe de Derek Jarman, e nela partiu do seu vínculo con esa escena punk de Londres para elaborar unha fantasía na que Isabel I é transportada no tempo ata o presente da época, cun Londres en decadencia social e física. Os escenarios destruidos acollen música, baile ou enfrontamentos violentos nos que participan artistas como Jordan, Adam Ant, Jayne County, Siouxsie Sioux, as Slits ou, trazando relacións con outros movementos, Richard O'Brien e Lindsay Kemp.

Mércores 6 ás 21:30 na Gentalha Do Pichel

Dirección

Rúa Santa Clara, 21
Santiago De Compostela
15704

Teléfono

+34981572426

Página web

http://cineclubedecompostela.wordpress.com/

Notificaciones

Sé el primero en enterarse y déjanos enviarle un correo electrónico cuando Cineclube de Compostela publique noticias y promociones. Su dirección de correo electrónico no se utilizará para ningún otro fin, y puede darse de baja en cualquier momento.