05/06/2026
Víctor Lorenzo presenta unha exposición en dúas partes na Galería Mínima Expresión de Redondela
A Galería Mínima Expresión de Redondela acolle durante os meses de xuño e xullo unha nova exposición do escultor Víctor Lorenzo, articulada en dúas partes que permiten achegarse a diferentes momentos e enfoques da súa creación artística.
A primeira parte da mostra, que poderá visitarse durante o mes de xuño, estará protagonizada pola escultura “Melómano”, peza realizada por Víctor Lorenzo para os premios Martín Codax da música promovidos pola asociación Músicas ao Vivo..
A galería conta coa colaboración do festival alternativo Millo Verde de Redondela que celebrou este ano a súa XIX edición vén de recibir o premio Organistrum, categoría dos Martín Códax que o recoñece como o mellor festival galego. Un recoñecemento que cumpre aquilo de que “a terceira vai a vencida”. Os e as integrantes da asociación Millo Verde amosaron a súa satisfacción tras recibir o premio na gala celebrada o pasado mes de maio no Pazo da Cultura de Pontevedra e que vai ser exposta na galería nesta primeira parte da mostra.
Durante o mes de xullo, a exposición ampliarase coa incorporación de varias obras do autor, ofrecendo unha visión máis ampla da súa traxectoria escultórica. As pezas seleccionadas permitirán descubrir os procesos de investigación formal e conceptual que caracterizan o traballo de Lorenzo, así como o seu particular diálogo cos materiais e os volumes.
Con esta exposición, a Galería Mínima Expresión situada na fachada da DiscoTasca na rúa Pai Crespo de Redondela reafirma o seu compromiso coa promoción da creación artística contemporánea e co apoio aos artistas vinculados ao panorama cultural galego.
Exposición: Víctor Lorenzo
Lugar: Galería Mínima Expresión, Disco Tasca. Redondela
Datas: Xuño e xullo de 2026
