07/08/2019
Korça, shënimet dhe ftesa e një vizitori.
'E dashur …,
Po të shkruaj këtë e-mail nga Korça. A ke dëgjuar ndonjëherë për një qytet në juglindje të Shqipërisë? Quhet Korçë, sigurisht që ke dëgjuar, ne qoftë se nuk ke dëgjuar, më vjen shumë keq për ty! Duhet se s’bën që ta shohësh, ta vizitosh, ta prekësh, ta ndjesh, të bëhesh njësh me të, dhe nëse arrin të bëhesh njësh me të, nuk do largohesh kurrë prej saj. Do ngjitesh si me zamkë (thonë korçarët e vjetër), sepse Korça të ngop dhe të bën të dehur, të bën të ndjehesh rrëzëllitës kur ti kalon përgjatë rrugicave me kalldrëm, ndjehesh serenatist kur kalon poshtë ballkoneve ta mbushura plot me mëllaga apo me jargavanë, ndjesh piktor si Vangjush Mio kur shkon lart mbi kodrat e qytetit dhe shikon nje peisazh piktoresk të qytetit dhe të fushës së Korçës, ndjehesh fotograf si Sotiri apo edhe si Gjon Mili sepse ke plot ç’të shkrepësh në atë qytet, ndjehesh aktor filmash si Pandi Raidhi, Stavri Shkurti, Aleko Prodani e të tjerë sepse në çdo rrugice të kujtohet një film i vjetër shqiptar, ndjehesh poezi si ato të Skënder Rusit kur ulesh të pish nje kafe ne një nga kafenetë e shumta në Pazar apo në zonën kembësore të qytetit. Do të ndjehesh vërtet edhe nikoqir, sikur je autokton, kur shikon burra e gra që fusin drutë e zjarrit nëper shtëpite e tyre duke u bërë gati për dimrin e bukur edhe ftohtë, madje edhe do habitesh disi kur shikon disa petë brumi të varura nëper ballkone dhe kur pyet se cfarë janë ato, të përgjigjen : “Vertet nuk ke ngrënë petka?” Ah, sa e bukur është kjo përkëdhelia që këta i bëjnë çdo fjale, e trajtojnë sikur e kanë fëmijë të vogël, e shikojnë si të dashurën e tyre. E dua shumë gjuhën e tyre. Ti nuk e di cfarë humb nëse mungon në këto ditë gushti në Korçë, sepse krahas freskisë që lyp të kesh një gjë të hedhur krahve mbrëmjeve në këtë qytet, atmosfera dhe qyteti zgjohet dhe fle me Festën e Birrës. Duke pyetur nëpër qytet se cfarë ndodh, me thonë që cdo vit, në mes të gushtit zhvillohet një festë birre, natyrshëm mendja më shkoi tek Birra Korca, e famshmja dhe e para birrë në Shqipëri, por jo, në këtë festë mblidhen gjithë birrat e vendit dhe festojnë 5 netë, gjithë qyteti, i madh e i vogel i përshkon një atmosferë festive, sa them që këta korçarë kanë lindur vetëm për qejf. Të gjithë i sheh mbledhur nepër vende të ndryshme, përplasin gota, veshur një buzeqeshje që pak kund e shikon në Shqipëri, këndojnë me kitarë këngët e tyre të vjetra, dhe i urojnë njëri tjetrit sa më shumë netë të tilla me një urim që nuk e kisha degjuar gjëkundi tjetër, thonë “Kështu u mbledhshim”! Eh, zot i madh, këta e paskan mendjen vetem tek qejfi! Do rikthehem përsëri në këtë qytet, do rikthehem me disa miq që i dua fort, do ju tregoj këtë qytet që me bëri të ndjehem si jashtë shtetit.”
