16/06/2026
Организирана од Општина Струмица, а со поддршка на Швајцарската Програма за зголемување на пазарната вработливост – ИМЕ, која работи на зајакнување на малите и средни претпријатија во секторите одржлив агробизнис и одржлив туризам, денеска во Домот на АРМ се одржа работилница на тема „Управување и рециклирање на пластична фолија за земјоделските култури во Македонија.
Како Општина којашто се наоѓа во еден од најголемите земјоделски региони и производители на храна во државата, но и Општина на којашто здравата животна средина и е приоритет, на работилницата активно учествуваше претставникот на општина Струмица, Томе Марангозов. Тој ги потенцираше предностите на регионот, но и заедничката потреба од правилното управување со земјоделската пластика за да може земјоделството да биде одржливо, а животната средина да биде заштитена од овој вид отпад.
На работилницата, покрај претставниците на општина Струмица и Швајцарската ИМЕ, учествуваа и претставници на релевантните институции, бизнис секторот, компаниите за управување со отпад и рециклирање, земјоделските производители и стопанските комори.
По разгледувањето на актуелната состојба за која анализата покажала дека употребата на пластични фолии во земјоделството расте, а постојните практики на собирање и отстранување - продажба на приватни собирачи, складирање или палење, создаваат сериозни ризици за животната средина, беа предложени низа конкретни мерки за подобрување на управувањето со земјоделската пластика. Учесниците ја нагласија потребата од воспоставување систем на проширена одговорност на производителите, со јасно дефинирани обврски за производителите и увозниците. Оваа мерка треба да биде придружена со измена на постојната законска рамка или донесување посебен закон за управување со земјоделска пластика, со кој ќе се опфатат пластенички, мулч и силажни фолии, агротекстил и други производи што се користат во земјоделството.
