KF. Brjánn

04/03/2015

Andri P. Guðmundsson, eða Partýandri St. Völluson eins og hann er aldrei kallaður, er formaður KF. Brjáns. Hann er mikill áhugamaður um allskyns mottur og þá helst andlitsmottur, þó að baðmottur fylgi fast á eftir. Hann hefur óeðlilega mikinn áhuga á andlitshári félagsbræðra sinna og nýtir hann sér Mottumars til fulls ár hvert til að fá útrás fyrir þá þráhyggju sína.

Mottumars 2015 - Safnaðu mottu fyrir málstaðinn.

03/03/2015

Hér kemur fyrsti liður í kynningu á stjórnendum KF. Brjáns sem taka þátt í Mottumars.

Birgir Þór Þorbjörnsson, eða Pabbi eins og hann er kallaður af sístækkandi hópi fólks er Margmiðlunarstjóri KF. Brjáns. Hann er einnig andlit félagsins, enda þykir hann myndarlegastur af stjórnarmönnum, en það skrifast nánast eingöngu á einstaklega leiðinlega þéttan og fallegan skeggvöxt hans, sem hinir stjórnarmeðlimirnir öfunda hann bara nákvæmlega ekkert af. Bara ekki neitt.

Leggið nú góðu málefni lið og heitið á KF. Brján

Mottumars 2015 - Safnaðu mottu fyrir málstaðinn.

29/12/2014

Kæru vinir,

Þann 27. desember síðastliðinn, fór fram Staðarskálamót í körfuknattleik í íþróttahúsinu á Hvammstanga. Ég þykist vita fullvel hvað þið flest eruð að hugsa; “Hverjum er ekki drullusama?” En ég get fullvissað ykkur um það að reyndar er til fólk sem hefur áhuga á ótrúlegustu hlutum, og þar á meðal körfuknattleik.
Lið KF. Brjáns, sem bar sigur úr býtum á mótinu í fyrra, mætti galvaskt til leiks með það háleita markmið að verja titilinn, en vegna fullkomlega ófyrirsjáanlegra aðstæðna varð þeim ekki kápan úr því klæðinu, né náðu leikmenn að sníða sér stakk eftir vexti. Eftir að hafa ráðfært sig við fagmenn á hinum ýmsu sviðum, hafa Brjánsmenn þó fundið aðal orsakir hrakfaranna, en þær má aðallega rekja til þess að einn af stjörnuleikmönnum KF. Brjáns, Birkir Þór Þorbjörnsson hefur neyðst til að leggja skóna á hilluna frægu, sökum þrálátra meiðsla í hægri stórutá og síhækkandi ennis, en augljóst þykir að spilamennska Brjánsmanna hefði verið með töluvert ólíku sniði ef hæfileika hans hefði notið við.

Brjánsmenn geta þó ekki annað gert en að senda nýkrýndum meisturum mótsins, Kormáki, hamingjuóskir með afrek sitt, en eins og flestir vita hefur fátt annað hefur verið rætt síðustu daga á Húnvetnskum kaffistofum en óaðfinnanleg spilamennska Ragga í Fæðó, en hann spilaði eins og engill og var eftir frammistöðuna réttlega lýst sem hvítu útgáfunni af Larry Bird.

Að lokum vilja Brjánsmenn óska landsmönnum öllum gleðilegra jóla og farsæls komandi árs.

Ókei bæ.

05/04/2014

Karlfélagið brjánn hefur fengið nýtt einkennismerki. Lagt var uppúr að merkið prýddu karlmannlegir hlutir og urðu því hrútar og "sterki kallinn í sirkusnum" fyrir valinu. Fljótlega verður svo ráðist í söfnun, fyrir prentun merkisins á búninga Knattspyrnufélagsins Brjáns.

05/03/2014

Kæru vinir,

Stjórn KF. Brjáns hefur ákveðið að taka sig saman í andlitinu í bókstaflegri merkingu. Nýverið hafa stjórnarmenn tekið upp á því að neita að skerða skegg sitt á milli nefs og efri varar, þvert gegn vilja mæðra þeirra. Athæfið er til þess gert að vekja athygli á svokölluðum Mottumars, sem flestir ættu að vera farnir að þekkja. Hægt er að styrkja málstaðinn með því að heita á piltana skeggfríðu á meðfylgjandi hlekk og hvetja Brjánsmenn eindregið til þess að fólk nýti sér þetta einstaka tækifæri til að láta gott af sér leiða.

Með þökkum,
Aðalstjórn KF. Brjáns

Mottumars 2014 - Safnaðu mottu fyrir málstaðinn.

21/02/2014

Sigurvegari Staðarskálamóts karla í körfuknattleik 2013