ასოციაცია “ქვევრის ღვინო”
მევენახე-მეღვინეთა მ ა ნ ი ფ ე ს ტ ი
ჩვენ, ასოციაციის “ქვევრის ღვინის” წევრები, საკუთარი თავისუფალი ნების კარნახით ვერთიანდებით ჯგუფად და ვიღებთ ჩვენი ქმედებების განმსაზღვრელ ერთიან კოდექსს, რადგან:
ჩვენ პატივს ვცემთ, ვუფრთხილდებით და მომავალი თაობებისთვის ვიცავთ ქვევრის მეღვინეობის იმ ტრადიაციას, რომელმაც გაუძლო ათასწლეულებს და ვაცნობიერებთ, რომ იგი ა
რის კაცობრიობის სამეურნეო კულტურის ერთერთი მნიშვნელოვანი მონაპოვარი.
ჩვენ მიგვაჩნია, რომ ქვევრის მეღვინეობის ტრადიციაში დაუნჯებულია კრეატიული ძალა, რომელიც ხელს შეუწყობს მევენახეობა-მეღვინეობის დარგში არსებული კრიზისის დაძლევას.
ჩვენ ვთვლით, რომ ქვევრის ტრადიციული მეღვინეობა და ეკოლოგია ურთიერთთავსებადი ცნებებია, მეტიც ერთი მეორის გარეშე არ უნდა არსებობდეს. ამიტომ ვთანხმდებით: რაც შეიძლება ნაკლები ზიანი მივაყენოთ როგორც ჩვენ ვენახებს, ასევე მათ გარემომცველ ბუნებას; ვიზრუნოთ ჩვენი ვენახების ბიომრავალფეროვნებაზე; არ გამოვიყენოთ ძლიერმოქმედი სისტემური პრეპარატები, ჰერბიციდები და სინთეტური სასუქები; შეძლებისდაგვარად შევამციროთ მძიმე ტექნიკის მუშაობა ნიადაგის მოვლისთვის და საერთოდ არ გამოვიყენოთ ყურძნის საკრეფი მანქანები რთველის დროს.
ჩვენ გვჯერა, რომ ქვევრში დაყენებული და დავარგებული ღვინო უნდა ატარებდეს როგორც მისი ჯიშის, ასევე საკუთარი ადგილწარმოშობის ნიშნებს, ამიტომ ვთანხმდებით: რაც შეიძლება ნაკლებად ჩავერიოთ ღვინის ფერმენტაცია მაცერაციის პროცესში, ანუ არ ვისარგებლოთ იმ სუბსტანციებით და ხერხებით, რომლებიც ცვლიან ღვინის ბუნებრივ სახეს, მაგალითად : სელექციური საფუარით, მჟავებით, ენზიმებით, ტანინებით, ექსტრატით, გამწებავი და გამწმენდი საშუალებებით, უარყოფითი ოსმოსით, შაპტალიზაციით, თერმული დამუშავებით, გოგირდის ანჰიდრიდით ფერმენტაცია მაცერაციისას (მცირე დოზით გოგირდის ანჰიდრიდის ხმარება დაშვებულია მხოლოდ დავარგებისას ან ღვინის ბოთლში ჩამოსხმის წინ) და წმინდა ფილტრებით ღვინის დაყენების ნებისმიერ ეტაპზე (მსუბუქი ფილტრაცია დაშვებულია მხოლოდ ბოთლში ღვინის ჩამოსხმის წინ).
ჩვენი მიზანია შთამომავლობას გადავცეთ ჯანსაღი, სიცოცხლის უნარიანი და მსხმოიარე ვენახები, ხოლო ჩვენს თანამედროვე ადამიანებს მივცეთ საშუალება ღვინის დალევისას ალკოჰოლის, სურნელის და გემოს გარდა მიიღონ ის ვიტალური ძალებიც, რომელთა გაღებაც მხოლოდ ბუნებას შეუძლია. …
