03/04/2012
მიხეილ სააკაშვილმა საგურამოში ლუდის ახალი საწარმო სიმბოლურად გახსნა, სადაც ჩეხი ტექნოლოგების მეთვალყურეობით, უმაღლესი ხარისხის ლუდსა და რამდენიმე სახეობის ლიმონათს აწარმოებენ. ახალი პროდუქცია საქართველოს ბაზარზე ხვალიდან გამოჩნდება, თუმცა კომპანიის მესვეურები მის ექსპორტზე გატანასაც გეგმავენ. ქარხანა მთლიანად ქართული ინვესტიციით აშენდა, რისთვისაც 32 მილიონზე მეტი ევრო დაიხარჯა. სააქციო საზოგადოებამ „ქართული ლუდის კომპანია“ საწარმოს მშენებლობა 8 თვეში დაასრულა და უახლესი ევროპული ტექნოლოგიებით აღჭურვა. ქარხანაში უკვე 700 ადამიანია დასაქმებული, რომელთაგან 200 იძულებით გადაადგილებული პირია.
საქართველოს პრეზიდენტმა საწარმოს პერსონალს სიტყვითაც მიმართა, მათ ქვეყნის ეკონომიკურ განვითარებაზე ესაუბრა. ჩეხეთის ერთ-ერთი კომპანიის წარმომადგენელმა მიხეილ სააკაშვილს სიმბოლურად, ოქროს გასაღები გადასცა და წარმატება უსურვა.
